काठमाडौँ – सन् १९९० मा रिलिज भएको र उत्कृष्ट कथा र शक्तिशाली संवाद भएको प्रतिष्ठित फिल्म ‘घायल’ रिलिज भएको ३५ वर्ष पुरा भएकाे छ । यसै अवसरमा सन्नी देओलले सामाजिक सञ्जालमा पोस्ट गर्दै ‘घायल’ लाई विशेष फिल्म भनेका छन्।
सनी देओल फिल्ममा मुख्य भूमिकामा थिए र उनको पात्रको नाम ‘अजय मेहरा’ थियो। घायलकाे ३५ औं वार्षिकोत्सवकाे अवसरमा सन्नी देओलले सामाजिक सञ्जालमा फिल्मसँग सम्बन्धित भिडियो मोन्टेज सेयर गरेका छन्।
राजकुमार सन्तोषी निर्देशित यो फिल्मले सन्नीलाई बलिउडमा एक बलियो अभिनेताको रूपमा परिचय गराउन महत्वपूर्ण भूमिका खेलेको थियो।
सनीले इन्स्टाग्राममा फिल्मका उत्कृष्ट दृश्य र संवादहरूको भिडियो सेयर गर्दै क्याप्सनमा लेखेका छन्, “आज ‘घायल’ ले ३५ वर्ष पूरा गरेको छ। तर, यस्तो लाग्छ कि हामीले ‘अजय मेहरा’ को कथा र चरित्र हिजो मात्र सिर्जना गरेका हौं। अजयको साहस, उनको दृढता र न्यायको भावना अझै पनि दर्शकहरूको हृदयमा छ। यो मेरो लागि केवल एउटा भूमिका मात्र होइन, हृदयको टुक्रा हो। यसले मलाई चुनौती दियो, मलाई प्रेरित गर्यो र कथाको शक्तिको बारेमा सचेत गरायो। घायल मेरो लागि एकदमै विशेष फिल्म हो।”
फ्यानहरूले उनको पोस्टमा टिप्पणी गरेर सनी देओलको प्रशंसा गरेका छन्। एक प्रयोगकर्ताले लेखे, “बलिउडको वास्तविक र उत्कृष्ट एक्सन हिरो।” अर्कोले भने, “मेरो मनपर्ने बाल्यकालको फिल्म।” तेस्रो प्रयोगकर्ताले लेखे, “९० को दशक सबैभन्दा राम्रो, पुरानो थियो!”
‘घायल’ राजकुमार सन्तोषीको पहिलो निर्देशित फिल्म थियो। साथै, फिल्म धर्मेन्द्रले निर्माण गरेका थिए। यस फिल्ममा सनी देओलसँगै मीनाक्षी शेषाद्री, राज बब्बर र अमरीश पुरी मुख्य भूमिकामा छन्।
सनी देओल र मीनाक्षी शेषाद्रीसँगै अभिनेत्री मौसमी चटर्जी, अन्नु कपूर, ओम पुरी, शरत सक्सेना र सुदेश बेरी जस्ता कलाकारहरूले पनि यसमा महत्त्वपूर्ण भूमिका खेलेका थिए। यो फिल्म बक्स अफिसमा सुपरहिट भयो र १९९० को दोस्रो सर्वाधिक कमाई गर्ने फिल्म बन्यो।
कार्यक्षेत्रको कुरा गर्दा, सनी देओल आफ्नो आगामी फिल्म ‘बोर्डर २’ को छायांकनमा व्यस्त छन्, जसमा अभिनेता वरुण धवन, दिलजीत दोसांझ र अहान शेट्टी पनि छन्। अनुराग सिंह निर्देशित यो युद्ध नाटक २०२६ को जनवरी २३ मा रिलिज हुनेछ।
यो खबर पढेर तपाईलाई कस्तो महसुस भयो ?
प्रतिक्रिया