गोविन्दकी पत्नी सुनिताले हटाइन् ‘आहुजा’ थर, सम्बन्ध विच्छेदको खबरमा दिइन् प्रतिक्रिया

काठमाडौँ – गोविन्दकी श्रीमती सुनिताले सामाजिक सञ्जालबाट गोविन्दको थर हटाएकी छन् । सुनिताले इन्स्टाग्राममा थर हटाएसँगै अब उनले यसको पछाडिको कारण बताएकी छिन्।

सुनिता आहुजा र गोविन्द आफ्नो व्यक्तिगत जीवनलाई लिएर लामो समयदेखि समाचारमा छन्। केही समयअघि गोविन्द र सुनिताबीच दरार आएको र दुवैले सम्बन्ध विच्छेद गर्ने योजना बनाएको खबर आएको थियो।

गोविन्दको वैवाहिक सम्बन्धबाहिरको सम्बन्धको खबर पनि आएको थियो। तर, त्यसपछि सुनिता अगाडि आएर यी सबै रिपोर्टहरूलाई अस्वीकार गर्दै झुटो हाे भनेकी थिइन्। उनले आफू गोविन्दसँग खुसी रहेको र गोविन्दसँग सम्बन्ध विच्छेद नगर्ने बताइन्।

अहिले हालै सुनिताले इन्स्टाग्राममा आफ्नो नाम परिवर्तन गरेकी छिन्। यसपछि गोविन्द र सुनिताबीच सम्बन्ध विच्छेदको खबर फेरि आउन थालेको छ। ईटाइम्स सँगको कुराकानीमा सुनिताले फेरि एकपटक यी रिपोर्टहरूलाई अफवाह भनेकी छिन्। सुनिताले भनिन्, ‘म आहुजा हुँ र यो कहिल्यै परिवर्तन हुने छैन। थर तब मात्र हटाइनेछ जब तपाईं यो संसारबाट जानुहुन्छ।’

सुनिताले आफ्नो नाम किन परिवर्तन गरिन् ?

सुनिताले गोविन्दसँग सम्बन्ध विच्छेदको खबरमा थप प्रतिक्रिया दिइन्। सुनिताले भनिन्, ‘मैले मेरो नामबाट आहुजा हटाएँ र मेरो पहिलो नाममा अतिरिक्त S थपेँ। मैले यो अंकशास्त्रको लागि गरें। मलाई नाम र प्रसिद्धि चाहियो। कसलाई चाहँदैन। हैन र?’

सुनिताले थप भनिन्, ‘हामी एक खुसी परिवार हौं र हामीबाट सिधै केही नआएसम्म केही सोच्दैनौं।’ सुनिताको इन्स्टाग्राम अकाउन्टमा अहिले सुनिताको नाम मात्र लेखिएको छ। गोविन्द र सुनिताको बारेमा कुरा गर्दा, दुवैको प्रेम विवाह भएको थियो। उनीहरूले १९८७ मा विवाह गरेका थिए। गोविन्द र सुनिताका दुई सन्तान छन्, एक छोरी र एक छोरा।