भक्तपुर – आफ्ना नगरवासीलई घरदैलोमै पुगेर निःशुल्क स्वास्थ्य सेवा दिने उद्देश्यले मध्यपुरथिमि नगरपालिकाले ज्येष्ठ नागरिक स्वास्थ्य सेवा तथा महिला सु–स्वास्थ्य कार्यक्रम शुभारम्भ गरेको छ ।
मध्यपुरथिमि नगरपालिकाले ६० वर्षभन्दा माथिका ज्येष्ठ नागरिक तथा गर्भवती महिला र ‘क’ वर्गका अशक्तहरूका लागि बिहीबार नगरपालिकाका प्रमुख सुरेन्द्र श्रेष्ठले मध्यपुरथिमि नगरपालिका–६ पाटीबिहारबाट निःशुल्क घरदैलो स्वास्थ्य सेवाको शुभारम्भ गरे ।
नगरपालिकाद्वारा सञ्चालित नेपाल कोरियामैत्री नगरपालिका अस्पतालका मेडिकल अधिकृतको संयोजकत्वमा चिकित्सक, नर्स, ल्याब असिस्टेन्टसहित आवश्यक स्वास्थ्यकर्मीसहितका जनशक्ति प्रत्येक दिन वडावडामा पुगेर सेवा दिन सुरु भएको हो ।
नगरप्रमुख सुरेन्द्र श्रेष्ठले नगरपालिकाले सञ्चालन गरेको नेपाल कोरियामैत्री नगरपालिका अस्पतालमा हाल दैनिक एक हजार हाराहारीमा सेवाग्राही आइरहेको अवस्थामा ज्येष्ठ नागरिक र गर्भवती महिलालाई अस्पतालमा आएर घण्टौँ लाइन बस्न नपरोस् भनेर यो सेवा शुभारम्भ गरेको बताए ।
अस्पतालका विशेषज्ञ चिकित्सकसहितको टोलीले प्रत्येक वडामा महिनाको दुईपटकका दरले वडावडामा निःशुल्क स्वास्थ्य सेवा उपलब्ध गराउने र घरबाहिर सेवा लिन जान नसक्ने अशक्त एवं ज्येष्ठ नागरिकलाई घरदैलोमा नै गएर स्वास्थ्य सेवा उपलब्ध गराइने उनले बताए।
कार्यक्रममा नगरपालिकाका उपप्रमुख विजयकृष्ण श्रेष्ठले उच्च रक्तचाप, मधुमेहजस्ता दीर्घरोगका बिरामी अब अस्पतालसम्म धाउनु नपर्ने र आफ्नै वडामा महिनामा दुईपटक स्वास्थ्य जाँच गराएर औषधि लिन सक्नेगरी अभियान सुरु गरेको बताए । यो अभियानबाट गम्भीर रोग लाग्नुअगावै रोगको पहिचान गर्न मद्दत पुग्ने र समयमै उपचारमा टेवा पुग्ने उनले बताए ।
नेपाल–कोरियामैत्री नगर अस्पतालका प्रमुख डा दीपेन्द्रकुमार रोशनले नगरवासीलाई अब सहज स्वास्थ्य सेवाको पहुँचमा पुर्याउने बताउँदै ज्येष्ठ नागरिक, अशक्त, गर्भवती महिलालाई वडावडा र घरघरमा पुगेर स्वास्थ्य सेवा दिँदा सबैलाई स्वास्थ्यको पहुँचमा पुर्याउन सकिने बताए।
मध्यपुरथिमि नगरपालिकामा १० हजार ३५ जना ६० वर्ष उमेरमाथिको जनसङ्ख्या रहेको स्वास्थ्य शाखा संयोजक श्रीकृष्ण श्रेष्ठले जानकारी दिए । स्वास्थ्य बिमा नगरेका सो उमेर समूहका ज्येष्ठ नागरिक र महिला स्वास्थ्यअन्तर्गत गर्भवती महिलाको नगरपालिकाले निःशुल्क बिमा गरिदिने उनले बताए ।
यो अभियानमा सम्पूर्ण ल्याब सेवा, बिमामा पर्ने सम्पूर्ण उपलब्ध औषधि, आवश्यकानुसार ९अल्ट्रासाउन्ड० भिडियो एक्सरे सेवा, आवश्यकतानुसार विशेषज्ञ सेवा नागरिकले आफ्नै वडामा पाउने उनले बताए ।
यो खबर पढेर तपाईलाई कस्तो महसुस भयो ?
प्रतिक्रिया