जोखिमपूर्ण बाटो भएर अमेरिकामा पुगेका भारतका ती मानिसको सपना चकनाचुर !

काठमाडौँ – अमेरिकाबाट ११६ अवैध आप्रवासीहरू बोकेको एउटा विमान शनिबार राति अमृतसर अन्तर्राष्ट्रिय विमानस्थलमा अवतरण गरेको थियो, यससँगै भारतका ती मानिसहरूको अमेरिकामा राम्रो भविष्य निर्माण गर्ने सपना पनि चकनाचुर हुन पुगेको छ ।

पहाड, जङ्गल र समुन्द्रको जोखिमपूर्ण बाटो भएर राम्रो भविष्यको सपना बोकेर अमेरिका गएका यी मानिसहरु सिमानामा नै प्रहरीले समातेका थिए भने त्यस पछि यी मानिसहरूलाई अमेरिकाबाट निष्कासित गरिएको छ । भारत फर्काए पछि यी युवाले आफ्नो पीडा अहिले सुनाउन थालेका छन् ।

एनडीटीभीका अनुसार नवानकोट निवासी मंगल सिंह थिन्द आफ्नो नाति जसनूर सिंहलाई लिन एयरपोर्ट आएका थिए। यस क्रममा उनले भने, ‘एजेन्टले हाम्रो बच्चालाई सिधै अमेरिका लगिने बताएको थियो तर उनलाई कोलम्बिया लगियो र त्यहाँ ३–५ महिना बस्न भनियो । त्यसपछि जहाजबाट पनामा लगियो, जहाँ उनीहरूले घना जङ्गल पार गर्नु परेको थियो। उनीहरूसँग हाम्रो दिनमा दुई पटक कुरा हुन्थ्यो, त्यो बेला हामीले उनीहरू निकै नै दुखित र थकितसमेत भएको देखेका थियौं र मनमा अफसोस लागिरहन्थ्यो कि उनीहरूलाई हामी टाढा पठायौं भनेर ।

सिमा नजिकको पहाडी इलाकाबाट अमेरिका छिरेको दुई–तीन घण्टामै पक्राउ परेको फिरोजपुरका सौरभले बताएका छन । उनको समस्या जनवरी १७ मा सुरु भयो, जब एक एजेन्टले उनलाई अमेरिका पठाउन ४५ लाख रुपैयाँ लिएका थिए । त्यसपछि उनलाई एक हप्ताको लागि मलेसिया, त्यसको १० दिनमा फेरी मुम्बई फर्काइयो र त्यसपछि एम्स्टर्डम, पनामा, तपाचुला र मेक्सिको सिटी हुदैँ अमेरिका नजिक लगिएको थियो। त्यहाँबाट ३–४ दिनको यात्रा गरेर उनीहरू अमेरिका पुगेका थिए ।

अन्ततः सीमा पार त गरे तर पनि उनीहरुको समस्याको अन्त्य भने भएन किनभने लगत्तै पकाउ परेका उनीहरूलाइ प्रहरीले प्रहरी चौकी लगेर शिविरमा पठायो, जहाँ उनीहरु १५–१८ दिन बसेका थिए । उनले भने, ‘कसैले हाम्रो भनाइ लिएको छैन, हाम्रो अपील कसैले सुनेन । हाम्रा हात र खुट्टा बाँधिएका थिए, हाम्रा फोनहरू जफत गरियो र हामी विमानमा चढ्दा हामीलाई देश निकाला गरिएको भनिएको थियो।’

अर्का निर्वासित गुरबचन सिंहका बुबा जतिन्दर पाल सिंहले छोरालाई अमेरिका पठाउन ५० लाख रुपैयाँ तिरेको तर आफूलाई ‘डंकी रूट’बाट लैजान्छ भन्ने थाहा नभएको बताए । भारतमा जागिर पाउन नसक्दा छोरालाई विदेश पठाउनुको विकल्प नभए पछि उनले त्यत्रो रकम खर्चेर अमेरिका पठाएको जनाएका छन ।