आज सोनाम ल्होसार, देशभर सार्वजनिक बिदा

काठमाडौँ- तामाङ समुदायले आज विविध कार्यक्रम गरी सोनाम ल्होसार पर्व मनाउँदैछन् । यस पर्वमा तामाङ समुदायले कुल पूजा, प्रकृति पूजा र बुद्धका सन्देशको स्मरण गर्नाका साथै आफन्तजन भेला भई मनोरञ्जन गर्दै आपसमा खुसी आदानप्रदान गर्ने चलन छ ।

मञ्जुश्री सम्वत्–२८६१ सोनाम ल्होछार डुक (गरुड) वर्षको बिदाइ र डुल (सर्प) वर्षको स्वागत गर्दै मनाइँदै छ । मुसा, गाई, बाघ, खरायो, गरुड (मेघ), सर्प, घोडा, भेडा, बाँदर, चरा, कुकुर र सुँगुर गरी १२ वर्गमा सोनाम ल्होसारलाई विभाजन गरिएको छ ।

ल्होसारका १२ वटै वर्ष पशुपन्छीको नामबाट गणना गरिएको छ । तामाङ जातिको बाहुल्यता रहेको बागमती प्रदेशका विभिन्न जिल्लामा यो पर्व विशेषरूपले मनाइन्छ ।

तामाङसहित ह्योल्मो, थकाली, जिरेल, भोटे, दुरा, लेप्चा आदि जातिहरूले समेत आआफ्नै शैली र परम्पराअनुसार यो पर्व मनाउँदै आएका छन् । पर्वका अवसरमा सरकारले देशभर सार्वजनिक बिदा दिएको छ ।