बालबालिकाको शरीरमा मालिस गर्नु किन जरुरी छ ?

काठमाडौँ– बच्चाको विकास र सिकाइका लागि अभिभावकको स्पर्शको पनि महत्वपूर्ण भूमिका हुन्छ । त्यसकारण बच्चासँग कुराकानी गर्न स्पर्श गर्ने कुरामा आमाबाबुले जोड दिनुपर्छ ।

मसाज बच्चासँग कुराकानी   गर्दै गर्न सकिने सबैभन्दा प्रभावकारी तरिका हो । जन्मेपछि बच्चाको विकासमा आमाको दूधसँगै मसाजको पनि निकै महत्व हुन्छ । यसले बच्चाको शरीर मात्र होइन, शारीरिक र मानसिक स्वास्थ्यलाई पनि स्वस्थ राख्छ । आउनुहोस् बेबी मसाजका फाइदाहरूबारे जानौं ।

शारीरिक विकास

बच्चाहरूलाई मसाज गर्दा तिनीहरूको मांसपेशी र हड्डी राम्रोसँग विकास हुन्छ । यसले रक्तसञ्चार बढाउँछ र बच्चाको छालालाई पनि पोषण दिन्छ । मसाज गर्दा शरीरको नसाहरूमा रगतको प्रवाह तीव्र हुन्छ, जसले बच्चालाई स्वस्थ महसूस गराउँछ ।

पाचनसम्बन्धी समस्याको समाधान

तेलको मालिसले बालबालिकाको पाचन सम्बन्धी समस्याबाट छुटकारा पाउन पनि सहयोगी हुन्छ । पेट र कम्मरको भागमा हल्का मालिस गर्दा बच्चाहरूको पाचन प्रणालीमा सुधार हुन्छ । यसले ग्यास, पेट दुख्ने र कब्जियतको समस्यालाई हटाउँछ ।

छालाका लागि फाइदाजनक

बच्चाको छाला धेरै संवेदनशील हुन्छ । मसाजले छालालाई नरम र स्वस्थ राख्न मद्दत गर्छ । यसले छालालाई मोइस्चराइज गर्छ र यसलाई सुख्खा हुनबाट रोक्छ ।

निद्रामा सुधार 

धेरै बच्चाहरूलाई रातमा सुत्न समस्या हुन्छ । मसाजले उनीहरूको शरीरलाई आराम दिन्छ, जसले उनीहरूलाई राम्रोसँग निन्द्रा पर्छ । जब बच्चाहरू आरामसँग सुत्छन्, उनीहरूको मानसिक र शारीरिक विकास ठीकसँग हुन्छ । बच्चाहरूलाई मालिस गर्दा उनीहरूलाई मानसिक शान्ति र आराम मिल्छ । यसले उनीहरुको मुड पनि राम्रो राख्छ ।

रक्त सञ्चारमा सुधार

बच्चाहरूलाई मसाज गर्दा उनीहरूको रक्तसञ्चारमा सुधार हुन्छ । मालिसले बच्चालाई ताजापन र ऊर्जा दिन्छ र रगतको प्रवाह राम्रो हुन्छ । जसले गर्दा बच्चालाई बढी अक्सिजन मिल्छ र शरीर स्वस्थ रहन्छ ।

मजबुत सम्बन्ध

जब तपाईं आफ्नो बच्चालाई मसाज गर्नुहुन्छ, यसले आमाबाबु र बच्चा बीच बलियो बन्धन सिर्जना गर्छ । मसाज गर्दा बच्चाहरूले महसूस गर्ने स्पर्शले उनीहरूलाई सुरक्षा र प्रेमको भावना दिन्छ । जसले बच्चामा मानसिक शान्ति र सुरक्षाको भावना पैदा गर्छ ।

बच्चालाई मालिस गर्नका लागि नरिवल, जैतुनको तेल उपयुक्त मानिन्छ । मालिस गर्दा बच्चालाई सकेसम्म आराम मिल्ने स्थान र समय छनोट गर्ने कुरामा एकदमै ध्यान दिनु जरुरी हुन्छ । पाँचदेखि दश मिनेट मालिस गर्दा बच्चालाई आराम मिल्छ ।