काठमाडौँ– अभिनेत्री दिव्या रायमाझी अभिनित फिल्म ‘एक्टरः टेक वान’ यही माघ १६ गतेदेखि प्रदर्शनमा आउँदैछ । यो फिल्ममा उनको शीर्ष भूमिका छ ।
फिल्ममा अनुबन्ध भएदेखि नै दिव्याको चर्चा चुलिएको छ । त्यसो त उनी अभिनेता दीलिप रायमाझीकी छोरी भएकाले पनि स्वभाविक रुपमा उनको चर्चा अझ बढी छ । अर्कातर्फ लामो समय अमेरिका बसेर उतै हुर्केर पनि स्पष्ट रुपमा नेपाली भाषा बोल्न सक्ने कारण पनि फ्यानहरु उनीतर्फ आकर्षित भएका छन् ।
कतिपय नेपालीले विदेश गएपछि आफ्नो भाषा राम्रोसँग उच्चारण गर्न नसक्ने तर दिव्यामा त्यो दम्भ नभएको भन्दै तारिफ गर्नेको पनि कमी छैन । पहिलो फिल्मबाटै राम्रो चर्चा बटुलेकी दिव्याले आफू दीलिप रायमाझीकी छोरीका रुपमा भन्दा आफ्नो छुट्टै पहिचान बनाउन चाहने बताउँछिन् ।
सामाजिक सञ्जालमा पनि उत्तिकै सक्रिय रहने दिव्या यो फिल्म सफल हुनेमा आशावादी छिन् । फिल्ममा उनले अभिनेता प्रदीप खड्कासँग अनस्क्रिन रोमान्स गरेकी छिन् । पहिलो फिल्म रिलिजका क्रममा रहेको छ भने उनले अर्को फिल्म ‘पिताम्बर’ मा पनि अभिनय गरेकी छिन् ।
उक्त फिल्ममा पनि दिव्यालाई अभिनेता प्रदीप खड्कासँगै देखिने छ ।
दिव्या आफूलाई रमाइलो र स्वभाव राम्रो भएको केटा मन पर्ने बताउँछिन् । उनी नेपालमा फिल्म क्षेत्रमै स्थापित हुन चाहे पनि दर्शकको साथ कति पाउँछिन् । त्यो भने हेर्न बाँकी छ । नेपालमा स्टार किड्सलाई फिल्म क्षेत्रमा आउन सजिलो भए पनि दर्शकको मन जित्न आफैले मेहनत गर्नुपर्ने उनी बताउँछिन् ।
पहिलो फिल्म रिलिज नहुँदै चर्चामा आएकी दिव्या रजतपटमा स्थापित हुन कति सफल हुन्छिन् । त्यो भने समयले बताउनेछ ।
यो खबर पढेर तपाईलाई कस्तो महसुस भयो ?
प्रतिक्रिया