प्रदीपदेखि राजबल्लभसम्म: को को अटाए ‘एक्टर’को पोस्टरमा?

काठमाडौँ– प्रदीप खड्का र राजबल्लभ कोइरालाको अभिनय रहेको फिल्म ‘एक्टरः टेक वान’ को पोस्टर सार्वजनिक गरिएको छ । प्रतीक्षित मानिएको यो फिल्म आगामी माघ १६ गतेदेखि प्रदर्शनमा आउँदैछ ।

फिल्मले रिलिजअघि धेरैको चासो खिचेको छ । यसअघि फिल्मको टिजर समेत सार्वजनिक गरिएको थियो । उक्त टिजरले दर्शकको मिश्रित प्रतिक्रिया पाएको छ । फिल्मको हाइप बढ्नुको अर्को कारण के छ भने अभिनेता दीलिप रायमाझीकी छोरी दिव्या रायमाझी पनि यही फिल्मबाट रजतपटमा डेब्यु गर्दैछिन् ।

हालै सार्वजनिक पोस्टरमा प्रदीपलाई चकलेटी युवकको भूमिकामा देखाइएको छ भने फिल्मका शीर्ष कलाकारलाई पनि अटाइएको छ । दिव्याका अलावा आना शर्माको पनि शीर्ष भूमिका रहने यो फिल्ममा राजबल्लभ कोइरालालाई नकारात्मक भूमिकामा देखिने धेरैको अनुमान छ । यद्यपि निर्माण टिमले कथानकबारे केही खुलाएको छैन ।

राजन भुसालको निर्देशनमा बनेको यो फिल्ममा दिव्य देव, उषा रजक, सुशील सिटौला, बादल भट्ट, सिर्जना अधिकारी लगायतका कलाकारको समेत अभिनय रहने जनाइएको छ ।