मोबाइल चोरी गर्दा गर्दै दुई जना रंगेहात समातिए

काठमाडौँ- रौतहटमा मोबाइल चोर्दा चोर्दै दुई जना रंगेहात समातिएका छन् । चोरी रौतहटको सदरमुकाम गौर स्थित एकै रातमा छुट्टाछुट्टै दुई पसलको ताल्चा फुटाएर लाखौंको मोबाइल चोरी गर्ने दुई जना चोरलाई प्रहरीले रंगेहात पक्राउ गरेको छ ।

चोरीको मोबाइलसहित पक्राउ पर्नेहरुमा स्थानीय राजदेवी नगरपालिका ९ ब्रहमापुरीका सोनालाल मण्डलको छोरा वर्ष १९ को शिवजी मण्डल र सोही ठाउँका १८ वर्षीय निरज मण्डल रहेको जिल्ला प्रहरी प्रवक्ता डीएसपी दिपक कुमार रायले बताएका छन् ।

उनीहरूमाथि बिहीवार चोरी सम्बन्धी मुद्दा दायर गरी जिल्ला अदालत गौरबाट म्याद थप गरी थप अनुसन्धान भइरहेको प्रवक्ता डिएसपी रायले जानकारी दिएका छन् । गत बुधबार राती उनीहरूले गौरस्थित चौधरी मार्केट भित्र नेशनल मोबाइल पसलको ताल्चा फुटाएर १५ थान मोबाइल चोरेर लागेका थिए ।

लगत्तै राति डेढ बजे गौर स्थित बरहवा पुल नजिक गौर इन्टरप्राइजेज मोबाइल पसलको ताल्चा फुटाएर ४ वटा मोबाइल चोरी गरेको थियो ।

सोही क्रममा जिल्ला प्रहरी कार्यालय रौतहटको गस्ती टोली र स्थानीय मिलेर दुबैजना लाई चोरी गर्दा रंगेहात पक्राउ गरेको जिल्ला प्रहरी कार्यालय रौतहटको सूचनामा उल्लेख गरिएको छ । पक्राउ परेका दुवैजना जिल्ला प्रहरी कार्यालय रौतहटको नियन्त्रणमा छन्।