के ‘टलकजंग भर्सेस टुल्के’ को सिक्वेल बन्दैछ? के भन्छन् खगेन्द्र?

काठमाडौँ– निश्चल बस्नेतको निर्देशनमा बनेको फिल्म ‘टलकजंग भर्सेस टुल्के’ प्रदर्शनमा आएको दश वर्ष बितिसकेको छ । खगेन्द्र लामिछानेको शीर्ष भूमिका रहेको यो फिल्मको अहिले पनि उत्तिकै चर्चा हुने गरेको छ ।

यो फिल्मले तत्कालीन समयमा पनि राम्रो व्यापार गरेको थियो । यसअघि फिल्मको सिक्वेल बन्नेबारे समाचार बाहिर आएको थियो । तर, आजका दिनसम्म पनि यसको कुनै तयारी भएको छैन ।

दर्शकले ‘टलकजंग भर्सेस टुल्के’ को सिक्वेलको अपेक्षा गरे पनि निर्माण टिमले आधिकारिक रुपमा यसबारेमा कुनै जानकारी दिएको छैन । त्यसो दुई वर्षअघि नै फिल्मको सिक्वेल बन्ने र पुरानै कलाकार दोहोरिने चर्चा चलेको थियो ।

फिल्ममा खगेन्द्रका अलावा दयाहाङ राई, सुशांक मैनाली, प्रकाश घिमिरे, ऋचा शर्मा, रविन्द्र सिंह बानियाँ लगायतका कलाकारको समेत अभिनय देख्न सकिन्छ । यो फिल्म युट्युबमा पनि उपलब्ध छ ।

‘टलकजंग भर्सेस टुल्के’ को सिक्वेल बन्ने चर्चाका बीच फिल्मका मुख्य कलाकार खगेन्द्र लामिछानेले भने यसलाई हल्ला मात्र चलेको बताएका छन् । उनले आफू अर्को फिल्मको छायांकनका क्रममा व्यस्त रहेको र ‘टलकजंग भर्सेस टुल्के’ बन्ने केबल हल्ला भएको बताएका हुन् ।

‘सिक्वेल बनाउने कुनै योजना छैन, यो केबल हल्ला मात्र हो,’ जोय नेपालको कुराकानीमा उनले भने ।

माओवादी द्वन्द्वकालका बेला नेपालका गाउँमा एक साधारण व्यक्तिले कसरी चरम पीडा भोग्न बाध्य हुन्छ भन्ने फिल्मको कथानक छ ।