काठमाडौँ – राष्ट्रवादी कांग्रेस पार्टी (एनसीपी) नेता तथा महाराष्ट्रका पूर्व मन्त्री बाबा सिद्दिकीको हत्या प्रकरणमा मुम्बई पुलिसले ठूलो खुलासा गरेको छ। मुम्बई क्राइम ब्रान्चले अहिलेसम्म प्रमुख नेताको हत्यामा संलग्न ४ जना अभियुक्तलाई पक्राउ गरिसकेको छ भने तीन अभियुक्त अझै फरार छन् । उनको विभिन्न जिल्लामा प्रहरी टोलीले खोजी गरिरहेको छ ।
मुम्बई पुलिसले अर्को ७.६२ एमएमको पेस्तोल बरामद गरेको छ। अभियुक्त शूटर गुरमेल सिंह र धर्मराज कश्यपले कुर्ला क्षेत्रमा भाडाको घरमा युट्युबमा भिडियो हेरेर गोली चलाउन सिकेकाे मुम्बई पुलिसले जनाएकाे छ ।
मुम्बई क्राइम ब्रान्चबाट प्राप्त जानकारी अनुसार बाबा सिद्दिकीको हत्याको सम्पूर्ण योजना पुणेमा बनाइएको थियो। बाबा सिद्दिकीको हत्याको षडयन्त्र तीन महिनाअघि सुरु भएको थियो, आरोपी बाबा सिद्दिकीको घरमा हतियार बिना पटकपटक गएका थिए । अभियुक्तले सिद्दिकीको घर र कार्यालयको हेरचाह गरेका थिए ।
अधिकारीका अनुसार मुम्बई क्राइम ब्रान्चले हालसम्म १५ जनाभन्दा बढीको बयान रेकर्ड गरेको छ, जसमा घटनाको समयमा उपस्थित धेरै प्रत्यक्षदर्शीहरू पनि छन्। बाबा सिद्दिकीको पहिचान गर्न शूटरहरूलाई बाबा सिद्दिकीको फोटो र ब्यानर दिइएको थियो। घटनाको २५ दिनअघि अभियुक्तले घर र कार्यालयको रेकिङ गरेका थिए ।
बाबा सिद्दीकी हत्याकाण्डमा पक्राउ परेका चौथो आरोपी हरीशले बिचौलियाको रूपमा काम गरेकाे प्रहरी स्राेतले जनाएकाे छ। पक्राउ अभियुक्त प्रवीण र फरार अभियुक्त शुभम लोन्करले गिरफ्तार शूटर गुरमेल सिंह र धर्मराज कश्यपलाई २ लाख रुपैयाँ दिएका थिए। यो पैसा चौथो अभियुक्त हरिशबाट पठाइएको थियो। गोली प्रहार गर्नेलाई नगदसँगै दुईवटा मोबाइल पनि दिइएको थियो । हरीश विगत ९ वर्षदेखि पुणेमा बस्दै आएका छन् । आरोपितले सञ्चारका लागि स्न्यापच्याट एप र कलका लागि इन्स्टाग्राम प्रयोग गरेको पनि अनुसन्धानबाट खुलेको छ । वास्तवमा स्न्यापच्याटमा एउटा यस्तो फिचर छ जसमा म्यासेज हेरेपछि यो स्वतः डिलिट हुन्छ ।
बाबा सिद्दिकी हत्या प्रकरणमा शुभम लोन्कर मुख्य षड्यन्त्रकारी मध्ये एक रहेको उनीहरुको अनुसन्धानले देखाएको प्रहरीले जनाएको छ । शुभम लोन्कर र गुण्डा नाइके लरेन्स बिश्नोईबीचको सम्बन्धबारे प्रहरीले अनुसन्धान गरिरहेको छ ।
सलमान खानको घर बाहिर गोली चलाएको आरोपमा शुभम लोन्करलाई क्राइम ब्रान्चले जुनमा हिरासतमा लिएको थियो तर प्रमाणको अभावमा रिहा भएको थियो । तर अनुसन्धानमा शुभम लरेन्स बिश्नोईका भाइ अनमोलसँग सम्पर्कमा रहेको खुलेको छ । लरेन्स बिश्नोई गिरोहले बाबा सिद्दिकीको हत्याको जिम्मेवारी लिएको छ ।
पूर्व कांग्रेस नेता बाबा सिद्दिकी (६६) यस वर्षको सुरुमा एनसीपी अजित पवार गुटमा सामेल भएका थिए। शनिबार राति तीनजनाले उनलाई मुम्बईको निर्मल नगर क्षेत्रमा विधायक छोरा जीशान सिद्दिकीको कार्यालय बाहिर रोकेर गोली हानेर भागेका थिए । तर केही समयमै गुरमेल र धर्मराज नामका दुई गोली प्रहार गर्नेलाई प्रहरीले समातेकाे थियाे।
यो खबर पढेर तपाईलाई कस्तो महसुस भयो ?
प्रतिक्रिया