काठमाडौँ– गायक रामकृष्ण ढकालले ‘रामकृष्ण ढकाल अष्ट्रेलिया टुर’ नामक साङ्गीतिक भ्रमणको शुरुवात अष्ट्रेलियाको सिड्नीबाट गरेका छन् ।
शनिवार बेलुकी सिड्नीस्थित रगडेलमा रहेको इन्द्रेणी फन्सन सेन्टरमा उनले आफ्नो नयाँ तथा पुराना गीत प्रस्तुत गरे ।
‘बिहान उठ्ने बितिकै’ गाउँदै स्टेजमा देखिएका गायक ढकालले आफ्ना चर्चित गीतहरू ‘बाँचुञ्जेलीलाई’, ‘ओराली लागेको’, ‘नजिक आउनुमा’, ‘चरीले त छाडेर’’ लगायतका गीत प्रस्तुत गरेका थिए ।
उनले स्वरसम्राट नारायण गोपालका गीतहरू स्थानीय ब्याण्डसँग प्रस्तुत गर्दा उपस्थित दर्शकले प्रत्यक्ष नारायण गोपाल सुनेको प्रतिक्रिया दिए ।
अन्त्यमा उनले आफ्ना डान्सिङ नम्बर ‘ए माया जदौ’ गाउँदा उपस्थितले नाचेर साथ् दिए । सन् २००९ देखि नै आफूले अष्ट्रेलियामा कन्सर्ट गरिरहेको र यो चौथोपटक रहेको गायक ढकालले बताए ।
‘अष्ट्रेलियामा मैले सधै मायाँ पाउनु गरेको छु, यसलाई धन्यवाद भन्ने म सँग शब्द छैन । मैले यहाँ ट्रयाक र ब्याण्ड गरी दुई चरणमा आफ्ना गीत प्रस्तुत गरेँ । यसपटकको अष्ट्रेलिया टुरको शुरुवात सिड्नीबाट गर्न पाउँदा म निकै उत्साहित छु’, उनले भने ।
कार्यक्रममा उनले नेपालमा लगातार परिरहेको पानीका कारण आएको बाढीपहिरो र त्यसबाट परेको असरबाट आफू पनि अछुतो नरहेको बताए ।
‘एउटा कलाकारको धर्म नै उसको कर्म हो । नेपालमा एकजना गीतकार हुनुहुन्छ र उहाँको परिवारलाई म आफ्नो परिवार मान्छु । उहाँको घरकै गेटमा पहिरो परेर थुनिनुभएको छ, उद्दार कार्य भइरहेको छ । तर, म एउटा कलाकारको धर्म निर्वाह गर्न यहाँ स्टेजमा छु,’ उनले भने ।
पाल्पा सर्भिसेसले आयोजना गरेको कार्यक्रममा गायक ढकालले तीन घण्टा गीतमार्फत दर्शकलाई बाँधेर राखे । आयोजक पाल्पा सर्भिसेसका अध्यक्ष दिनेश श्रेष्ठले कार्यक्रम भव्य र सभ्य रुपमा सफल भएको बताए ।
उनले भने,‘गायक ढकाललाई प्रत्यक्ष सुन्न सिड्नीवासी अधैर्य थिए, उनीहरूको उपस्थिति बाक्लो देखियो । उहाँलाई प्रत्यक्ष सुन्न् परिवारकै उपस्थिति देखिएको थियो, जहाँ बच्चादेखि वृद्धसम्म थिए । अर्थात् उहाँलाई सुन्न सवै वर्गका दर्शक देखिए ।’
गायक ढकालले यसपटकको दसैँ अष्ट्रेलियामै मनाउने भएकाले विभिन्न सहरमा आफू प्रस्तुत हुने बताए । उनले न्युक्यासल, एडिलेड लगायतका सहरमा आफ्नो प्रस्तुती तय भइसकेको जानकारी दिए ।
सोही कार्यक्रममा गायक ढकालले नेपाली सङ्गीतलाई विश्वभर चिनाउन गरेको योगदान र सङ्गीतमा दिएको निरन्तरताको कदर गर्दै आयोजक श्रेष्ठ, ए टू जेट क्लिनिङ सप्लाएर्स, क्लिनिङ् एण्ड हस्पिटालिटीका प्रमुख कृष्ण थापा र चलचित्र निर्माता सुभाष थापाले सम्मान गरेका थिए ।
उक्त अवसरमा गायक ढकालले आफ्नो गीत ‘जीवनको हिसाब’ वर्ल्ड प्रिमियर गरे । कार्यक्रममा उपस्थित दर्शकलाई आफ्नो भिडियोको पहिलो दर्शक बनाएका ढकालले गीतमा आर्थिक अभावका कारण जीविकोपार्जनका निमित्त विदेशिन बाध्य भएका नेपालीको कथा प्रस्तुत गरिएको बताए ।
‘यस गीतमा अहिलेको समसामयिकता प्रस्तुत गरेका छौँ । विदेशमा रहेकाले यसको कुनै न कुनै पक्षसँग जोडिनु हुन्छ जस्तो लागेको छ । यसको शब्द भाव अनुसार नै भिडियोसमेत तयार गरेका छौँ ।,’ उनले भने ।
यो खबर पढेर तपाईलाई कस्तो महसुस भयो ?
प्रतिक्रिया