फिल्म ‘एक्टर : टेक वन’ को टिजर सार्वजनिक

काठमाडौँ – अभिनेता राजबल्लभ कोइरालाको ‘कमब्याक’ फिल्म ‘एक्टरस् टेक वन’को टिजर सार्वजनिक भएको छ । शुक्रबार सार्वजनिक गरिएको १ मिनेट २० सेकेन्डको टिजरमा नायक कोइराला स्टाइलिस लुक्समा देखिएका छन् ।

टिजरमा शीर्ष चार कलाकारलाई नै स्थान दिइएको छ । नायक प्रदीप खड्कालाई भने विभिन्न चरित्रमा देखाइएको छ । उनी, नायिका आना शर्मा र दिव्या रायमाझीसँग प्रेममा रहेको टिजरमा देख्न सकिन्छ । साथै, टिजरले त्रिकोणात्मक प्रेम सम्बन्धको कथा फिल्ममा रहेको पनि सङ्केत गर्छ ।

दिब्याले यो फिल्मबाट नेपाली फिल्ममा अभिनय करिअर थालेकी हुन् । उनी अभिनेता दिलिप रायमाझीकी छोरी हुन् ।

राजन भुसालको निर्देशन रहेको यस फिल्म आगामी कार्तिक १५ अर्थात् लक्ष्मी पूजाबाट प्रदर्शनमा आउँदैछ । यसै फिल्मबाट नायक कोइराला १० वर्षपछि पर्दामा फर्कंदैछन् ।

यस फिल्ममा राजबल्लभ, प्रदीप, आना, दिव्यासहित दिव्यदेव र उषा रजक लगायतको अभिनय रहेको बताइएको छ । फिल्मको स्क्रिप्ट आकाश बराल र निर्देशक भुसालले संयुक्त रूपमा लेखेका हुन् ।

अदृत फिल्मस् र मोती फिल्मस्‌को संयुक्त प्रस्तुति यस फिल्मका निर्माता थमनकुमार भण्डारी हुन् । अनिश भुसाल सह-निर्माता र क्रियटीभ प्रोड्युसर मोती कार्की हुन् ।