भूइँकटहरको महत्त्व : क्यान्सरको जोखिम कम गर्ने देखि तौल घटाउनेसम्म

पोषक तत्त्वले भरिपूर्ण भूइँकटहर,सिजनल फलफूल मध्येको एक हो । जुन स्वादमा पनि निकै मिठो हुन्छ । यो एन्टिअक्सिडेन्टस् र इन्जाइमहरूले भरिपूर्ण फल हो ।

यसमा पोटासियम, क्याल्सियम, म्यांगनीज, फोलेट, फस्फोरस, जिङ्क, भिटामिन ए र भिटामिन के प्रचुर मात्रामा पाइन्छ । यो तपाईँको स्वास्थ्यका साथै छालाको लागि पनि फाइदाजनक मानिन्छ, किनभने यसमा धेरै भिटामिन सी हुन्छ । 

यसकारण आज हामी तपाईँलाई यसको सेवनले मिल्ने स्वास्थ्यलाभहरुको विषयमा जानकारी गराउँछौ ।

मुटुको लागि फाइदाजनक

भूइँकटहरमा पाइने उच्च फाइबर, पोटासियम र भिटामिन सी मुटुको स्वास्थ्यका लागि फाइदाजनक हुन्छ । यी पोषक तत्त्वहरूले कोलेस्ट्रोलको स्तर र रक्तचापलाई कायम राख्न मद्दत गर्न सक्छ, जुन हृदयसम्बन्धी समस्याहरूको प्रमुख कारणहरू हुन् । यसले स्ट्रोक र मिर्गौलाको पत्थरी बन्ने जोखिमलाई कम गर्न मद्दत गर्छ ।

क्यान्सरको जोखिम कम

भूइँकटहरमा धेरै मात्रामा भिटामिन सी, एन्टिअक्सिडेन्ट र उच्च मात्रामा फाइबर हुने भएकोले यसले क्यान्सर निम्त्याउने फ्री रेडिकलको उत्पादनलाई रोक्न मद्दत गर्छ ।

रोग प्रतिरोधात्मक क्षमता बढाउँछ

भूइँकटहरमा म्यांगनीज र भिटामिन सी दुवै राम्रो मात्रामा पाइन्छ । म्यांगनीज एक एन्टिअक्सिडेन्ट हो, जसले मेटाबोलिजम वृद्धिमा मद्दत पुर्‍याउँछ । भिटामिन सी रोग प्रतिरोधात्मक क्षमता बढाउन निकै प्रभावकारी हुन्छ । यी महत्त्वपूर्ण भिटामिन र खनिजहरू साथै एन्टी–इन्फ्लेमेटरी गुणहरूले तपाईँको प्रतिरक्षा प्रणालीलाई बलियो बनाउन मद्दत गर्दछ ।

तौल घटाउन प्रभावकारी

यदि तपाईँ तौल घटाउन चाहनुहुन्छ भने भूइँकटहर यसको लागि उत्कृष्ट फल हो । यो तौल घटाउनको लागि उपयुक्त छ किनभने यसमा अधिक फाइबर र कम क्यालोरी र कार्बोहाइड्रेट हुन्छ । यसले तपाईँलाई हाइड्रेटेड राख्न मद्दत गर्दछ साथै भोक नियन्त्रण गर्न र धेरै खानबाट बच्न मद्दत गर्दछ ।

पाचनमा सुधार

भूइँकटहरमा ब्रोमेलेन नामक इन्जाइम हुन्छ, जसले पाचनमा मद्दत गर्छ र प्रोटिनलाई तोड्न मद्दत गर्छ । यसमा उच्च फाइबर र पानीको मात्रा बढी हुने भएकोले भूइँकटहरले नियमित र स्वस्थ पाचन प्रणालीलाई कायम राख्न र कब्जियत रोक्न मद्दत गर्दछ ।