टिजरमा यस्तो देखियो ‘पूर्ण बहादुरको सारङ्गी’

काठमाडौँ– आगामी कात्तिक १५ (लक्ष्मीपूजा) मा प्रदर्शन हुने फिल्म ‘पूर्ण बहादुरको सारङ्गी’को टिजर सार्वजनिक भएको छ।

यो टिजरले फिल्मका दुई मुख्य पात्र विजय बराल र प्रकाश सपूतको जीवन सङ्घर्षलाई उजागर गर्छ।टिजरमा गरिबीका कारण बुवाले झेल्नुपरेको अभाव, छोराको शैक्षिक सफलता, र बिछोडको पीडालाई प्रस्तुत गरिएको छ।

बुवाको मुख हेर्ने दिनको अवसर पारेर सार्वजनिक गरिएको  टिजरलाई सम्पूर्ण बुवाहरूप्रति समर्पित गरिएको छ । जसमा सन्तानको लागि बुवाले गरेका बलिदान र सङ्घर्षलाई देखाइएको छ।

फिल्ममा विजय र प्रकाशसँगै मुकुन भुसाल, बुद्धि तामाङ, अञ्जना बराइली, माओत्से गुरुङ, देशभक्त खनाल लगायतका कलाकारहरूको उत्कृष्ट अभिनय रहेको छ। सरोज पौडेलको कथा र निर्देशनमा बनेको यो फिल्म सेभेन सिज सिनेमा र बाँसुरी फिल्म्सको संयुक्त प्रस्तुति हो। 

फिल्मको कथा गन्धर्व परिवारको जीवनमा आधारित सामाजिक–ड्रामा हो, जसको पटकथा तथा संवाद महेश दवाडीले लेखेका छन्।

 फिल्मको वितरण नेपाल र अन्तर्राष्ट्रिय स्तरमा सेभेन सिज इन्टरटेनमेन्टले गर्नेछ। निर्माता विनोद पौडेल र प्याट्रिक सुवेदीको लगानी रहेको फिल्ममा रमेश चौलागाईं, हरि श्रेष्ठ, र रमेश ढकाल कार्यकारी निर्माताको भूमिकामा छन्।