अग्लो हिल लगाउने बानीले निम्त्याउन सक्छन् यस्ता स्वास्थ्य समस्या 

अग्लो हिल भएको जुत्ता–चप्पल महिलाहरूमा लोकप्रिय छ । अग्लो र आकर्षक देखिन महिलाहरूले हिल जुत्ता लगाउने गर्छन् ।

कतिपयले त भन्ने गर्छन् हिल जुत्ता लगाएपछि आत्मविश्वास बढ्ने गर्छ । देख्दा आकर्षित देखिए पनि यो जुत्ता लगाएर हिँड्न भने त्यति सहज हुँदैन । किनभने, हिल खुट्टाका लागि आरामदायी जुत्ता होइन ।

लामो समय हिल लगाउँदा पैताला, घुँडा, ढाड, कम्मर, खुट्टामा असर गर्छ । यसले मांसपेशीहरूमा अस्वाभाविक दबाब सिर्जना गरेर मनलाई समेत अशान्त बनाउँछ ।

हिल जुत्ता नलगाउँदा शरीरको तौल सबैतिर बराबर हुन्छ । तर, हिल जुत्ता लगाउँदा तौल कतै धेरै कतै थोरै पर्न जान्छ । हिल जुत्ताले कुर्कुच्चालाई उठाउँछ ।

कुर्कुच्चा उठ्दा शरीरको भार अगाडि धकेलिन्छ । हिल लगाउँदा कम्मर निहुरिन्छ । यसले शरीरको मेरुदण्डमा समस्या पार्छ । जसकारण ढाडको नसामा दबाब पर्छ र नसाहरू जेलिन्छन् । 

हाम्रो शरीरको पूरा भार खुट्टाले नै थामेको हुन्छ । निरन्तर हिल जुत्ता लगाउँदा दबाब भएर खुट्टाको हड्डी कमजोर हुने सम्भावना हुन्छ । हिलले तत्कालीन रूपमा दुर्घटनाको जोखिम बढाउँछ भने दीर्घकालीन रूपमा शरीरमा विभिन्न समस्या निम्त्याउँछ ।

हिल जुत्ताले खुट्टाको स्वरूप बिग्रिने, सुन्निने र दुख्ने हुन्छ । पैताला दुख्ने र कुर्कुच्चा सुन्निने समस्या पनि हुने गर्छ । पैतालाको मांसपेशी तन्किएर दीर्घकालीन रूपमा नसासम्बन्धी रोगको सम्भावना समेत हुन्छ ।

अग्लो हिल लगाउँदा घुँडा र मेरुदण्डमा नकारात्मक असर पर्छ । घुँडामा दबाब परेपछि ढाड र कम्मरको समस्या देखिन्छ । 

हिल जुत्ता लगाउँदा यस्ता समस्याहरू देखिन सक्छन् । 

ढाडको समस्या

हिल जुत्ता लगाउँदा खुट्टालाई सहज हुँदैन । शरीरमा असन्तुलन पैदा गर्छ । मेरुदण्डमा असन्तुलन हुँदा ढाड दुख्छ । आजभोलि धेरैको रोजाइमा पेन्सिल हिल पर्ने गरेको छ । त्यसले झनै ढाड दुखाउँछ । त्यसैले लामो समय हिल जुत्ता लगाउनु हुँदैन । 

पैतालामा पीडा 

लामो समय हिल जुत्ता लगाउँदा पैतालामा समस्या हुन्छ । हिल जुत्ताले शरीर सन्तुलन नगर्ने भएकाले पैताला दुख्ने र पोल्ने समस्या देखिन्छ । 

खुट्टा मर्किने समस्या

हिल जुत्ता जतासुकै लगाएर हिँड्न सकिँदैन । कच्ची सडक, उकालो–ओरालो हिँड्दा खुट्टा चिप्लिएर मर्किन सक्छ । शरीरमा चोट लाग्न सक्छ । त्यसैले, हिल जुत्ता लगाउँदा निकै ध्यान पुर्‍याउनु पर्छ । 

घुँडा दुख्ने समस्या

अग्लो जुत्ताले घुँडामा बढी दबाब पर्छ । त्यसले गर्दा बिस्तारै घुँडा खिइँदै जान्छ । पोइन्टेट हिल लगाउँदा शरीरको सम्पूर्ण तौल खुट्टामा पर्ने भएकाले घुँडामा पनि असर पर्छ ।