‘घर नम्बर २’ मा अनुबन्धित भए केकी र उपासना

काठमाडौँ – ‘के घर के डेरा : घर नम्बर २’मा  अभिनेत्रीको रूपमा केकी अधिकारी र उपासना सिंह ठकुरी अनुबन्धित भएका छन् । 

निर्माण युनिटले बुधबार कलाकारको रूपमा यी दुई अभिनेत्री भित्र्याउँदै फिल्मको लाइनअप पूरा गरेको छ भने फिल्म साउन २५ गतेदेखि छायाङ्कनका लागि फ्लोरमा निस्कने तयारीमा छ ।

यसअघि फिल्मको मुख्य भूमिकामा खगेन्द्र लामिछाने, निश्चल बस्नेत र आर्यन सिग्देल छानिएका थिए । उपासनाले फिल्म ‘खुस्मा’को छायाङ्कन सकेपछि यो फिल्ममा काम गर्न लागेकी हुन् । 

काठमाडौँका विभिन्न स्थानमा छायांकन हुने यो फिल्मको निर्देशन दीपेन्द्र के. खनालले गर्ने छन् । फिल्मको कथा वुद्दिसागरले लेखेका हुन् । फिल्मलाई सामाजिक कथावस्तुमा निर्माण गरिने निर्माण पक्षको भनाई छ । 

ए प्लस इन्टरटेन्मेन्ट र नटराज  क्रियशनको ब्यानरमा निर्माण हुन लागेको यो फिल्ममा शरद श्रेष्ठ, किरण महर्जन, राजीव श्रेष्ठको लगानी रहनेछ । फिल्मका कार्यकारी निर्माता युवराज कार्की हुन् ।