इरानी सेनाका सेक्रेट एजेन्टको प्रयोग गरेर इस्माइलको हत्या गरिएको दाबी

काठमाडौँ – इरानले हमास प्रमुख इस्माइल हानियाहको हत्यामा संलग्न २४ जनालाई पक्राउ गरेको छ ।

यसमा धेरै इरानी गुप्तचर अधिकारीहरू, सैन्य अधिकारीहरू र अतिथि गृह कर्मचारीहरू समावेश छन् । यो त्यही गेस्ट हाउस हो जहाँ हानियामाथि हमला भएको थियो ।

न्युयोर्क टाइम्सका अनुसार इरानले हानियाको सुरक्षामा भएको कमजोरीलाई मध्यनजर गर्दै यी पक्राउ गरेको हो । वास्तवमा हानिया इरानी राष्ट्रपति मसूद पजाकियानको शपथ ग्रहण समारोहमा सहभागी हुन आएका थिए । उनी बसेको गेस्ट हाउसको सुरक्षाको जिम्मेवारी इरानको सेना आईआरजीसीमा रहेको छ ।

यसै क्रममा बेलायती मिडिया हाउस द टेलिग्राफले आफ्नो रिपोर्टमा हानियाको हत्यामा इजरायलको गुप्तचर एजेन्सी मोसादको हात रहेको दाबी गरेको छ । रिपोर्टका अनुसार मोसादले यस कामका लागि इरानबाट सेक्युरिटी एजेन्टहरू राखेको थियो ।

इजरायलले हानियालाई रायसीको अन्त्येष्टिको क्रममा मार्न चाहेको रिपोर्टमा बताइएको छ । तर, त्यतिबेलाको ठूलो भीडका कारण योजना असफल हुनसक्ने भएकाले स्थगित गरिएको थियो । त्यसपछि एजेन्टहरूले गेस्ट हाउसको ३ कोठामा बम राखेका थिए । त्यसपछि उनी देशबाट भागे । तर, उनका एकजना साथी इरानमै रहे । इरानी अधिकारीहरूले गेस्ट हाउसमा बम राखिएको सीसीटीभी फुटेज पनि फेला पारेका छन् ।

टेलिग्राफका अनुसार इरानी एजेन्टहरूको स्रोतले जुलाई ३१ मा हानियाको कोठामा उनको उपस्थितिको बारेमा जानकारी दिएको थियो । त्यसपछि एजेन्टहरूले बम विस्फोट गराए । उनको इरानको अन्सार अल-महदी इकाईका एजेन्टहरू मोसादले यस कामको लागि भर्ती गरेको रिपोर्टमा दाबी गरिएको छ ।

अनुसन्धानपछि बाँकी दुई कोठामा बम राखिएको भेटिएको छ । यस घटनालाई इरानको तर्फबाट ठूलो सुरक्षा त्रुटि भएको घटनाको रूपमा हेरिएको छ । यद्यपि सेनाले यसलाई लुकाउन खोजिरहेको दाबी गरिएको छ ।