शक्तिशाली पासपोर्ट भएका यी मुलुक, नेपालको पासपोर्ट कति बलियो ?

काठमाडौँ– अध्ययन, रोजगारी, भ्रमण वा आफन्तसँग भेटघाटका लागि अर्को देश जान राहदानी अर्थात् पासपोर्ट अनिवार्य कागजात हो । वर्तमान समयमा वैधानिक रुपमा एक देशबाट अर्को देशमा जानका लागि पासपोर्ट अनिवार्य हुन्छ ।

राज्यले प्रदान गर्ने पासपोर्टमा आफू भ्रमणमा जान चाहने देशको सम्बन्धित निकायले भिसा प्रदान नगरेसम्म वैधानिक रुपमा त्यो देश प्रवेश गर्न सम्भव नै हुँदैन ।

तर, त्यस्ता केही मुलुकहरु छन्, जसका पासपोर्ट वाहकले धेरै मुलुकमा विन भिसा नै प्रवेश पाउँछन् । यसैका आधारमा कुन देशको पासपोर्ट कति बलियो भन्ने निर्धारण गर्छ ।

बेलायती लगानी तथा आप्रवासन सहजीकरण कम्पनी हेन्स्ले एण्ड पार्टनर्सले हरेक वर्ष पासपोर्ट इन्डेक्स सार्वजनिक गर्दै आएको छ ।

अन्तर्राष्ट्रिय हवाई यातायात प्राधिकरण (आईएटीए) को तथ्यांकलाई आधार मान्दै विगत १९ वर्षदेखि यस्तो इन्डेक्स जारी गर्दै आएको हो । यस कम्पनीले सन् २०२४ का लागि पनि यस्तै सूची जारी गरेको छ ।

यो सूचीमा यस वर्ष नेपालको पासपोर्ट अर्को गरीब मुलुक लिबियासँगै ९८ औँ स्थानमा रहेको छ ।

हेन्स्ले एण्ड पार्टनर्सका अनुसार नेपाली पासपोर्ट वाहकले विश्वका ३९ मुलुकमा विना भिसा प्रवेश पाउँछन् । अघिल्लो वर्ष नेपाल यो सूचीमा १ सय ३ औँ स्थानमा रहेको थियो । आखिर संसारका सबैभन्दा शक्तिशाली १० पासपोर्ट कुन देशका होलान् ? हामीले यसबारेमा चर्चा गर्दैछौँ ।

सिङ्गापुर

हेन्स्ले एण्ड पार्टनर्सको सूचीमा सिङ्गापुर शीर्ष स्थानमा छ । दक्षिणपूर्वी एशियाली मुलुक सिङ्गापुरका पासपोर्ट वाहकले सन् २०२४ मा १ सय ९५ वटा मुलुकमा भिसा प्रक्रियाको झन्झट विनै प्रवेश पाउने जनाएको छ । अघिल्लो वर्ष सिङ्गापुर यो सूचीको दोस्रो स्थानमा थियो ।

जर्मनी, फ्रान्स, इटाली, जापान र स्पेन

संसारका सबैभन्दा शक्तिशाली पासपोर्टको सूचीमा युरोपेली मुलुकहरु जर्मनी, फ्रान्स, इटाली र स्पेनसहित एशियाली मुलुक जापान पनि दोस्रो स्थानमा रहेका छन् । यी मुलुकका पासपोर्ट वाहकले समान १ सय ९२ मुलुकमा विना भिसा प्रवेश पाउँछन् ।

अघिल्लो वर्ष भने यो सूचीमा जापानको शीर्ष स्थानमा थियो । त्यसैगरी, अघिल्लो वर्ष जर्मनी र स्पेन समान तेस्रो तथा इटाली र फ्रान्स क्रमशः चौथो र छैटौँ स्थानमा थिए ।

अस्ट्रिया, फिनल्याण्ड, आयरल्याण्ड, लक्जेम्बर्ग, नेदरल्याण्ड्स, दक्षिण कोरिया र स्विडेन

यो सूचीमा युरोपेली मुलुकहरु अस्ट्रिया, फिनल्याण्ड, आयरल्याण्ड, लक्जेम्बर्ग, नेदरल्याण्ड्स र स्विडेन तथा एशियाली मुलुक दक्षिण कोरिया समान तेस्रो स्थानमा रहेका छन् । यी मुलुकका पासपोर्ट वाहकले समान १ सय ९१ मुलुकमा भिसा बिना नै प्रवेश पाउँछन् । अघिल्लो वर्ष भने दक्षिण कोरिया यो सूचीको दोस्रो स्थानमा रहेको थियो ।

फिनल्याण्ड र लक्जेम्बर्ग समान चौथौ स्थानमा थिए । त्यसैगरी, अस्ट्रिया, नेदरल्याण्ड्स र स्विडेन समान पाचौँ स्थानमा थिए । आयरल्याण्ड भने छैटौँ स्थान थियो ।

बेल्जियम, डेनमार्क, न्युजिल्याण्ड, नर्वे, स्विट्जरल्याण्ड, बेलायत

यो सूचीको चौथो स्थानमा युरोपेली मुलुकहरु बेलायत, नर्वे, स्विट्जरल्याण्ड, डेनमार्क र बेल्जियमसहित दक्षिण प्रशान्त महासागरमा अवस्थित न्युजिल्याण्ड रहेका छन् । यी देशका पासपोर्ट भएका मानिसहरुले समान १ सय ९० देशमा बिना भिसा प्रवेश पाउँछन् ।

अघिल्लो वर्ष यो सूचीमा डेनमार्क पाचौँ स्थनमा रहेको थियो । त्यसैगरी, बेलायत छैटौँ स्थनमा थियो । बेल्जियम, न्युजिल्याण्ड, नर्वे र स्विट्जरल्याण्ड भने समान सातौँ स्थानमा थिए ।

अस्ट्रेलिया र पोर्चुगल

यस वर्ष सबैभन्दा शक्तिशाली पासपोर्ट हुने मुलुकको सूचीमा अस्ट्रेलिया र पोर्चुगल पाचौँ स्थानमा रहेका छन् । यी मुलुकका पासपोर्ट भएका व्यक्तिले समान १ सय ८९ वटा मुलुकमा भिसा विना नै प्रवेश पाउने हेन्स्ले एण्ड पार्टनर्सले जनाएको छ । अघिल्लो वर्ष पोर्चुगल छैटौँ र अस्ट्रेलिया आठौँ स्थानमा थिए ।

पोल्याण्ड र ग्रिस

सबैभन्दा शक्तिशाली पासपोर्टको सूचीमा युरोपेली मुलुकहरु पोल्याण्ड र ग्रिस छैटौँ स्थानमा रहेका छन् । यी मुलुकका पासपोर्ट वाहकले समान १ सय ८८ मुलुकमा विना भिसा प्रवेश पाउँछन् । अघिल्लो वर्ष यो सूचीमा ग्रिस आठौँ र पोल्याण्ड नवौँ स्थानमा रहेका थिए ।

क्यानाडा, चेकिया, हङ्गेरी र माल्टा

संसारको सबैभन्दा शक्तिशाली पासपोर्ट भएका मुलुकको सूचीमा युरोपेली मुलुकहरु चेकिया, हङ्गेरी र माल्टा तथा उत्तर अमेरिकी मुलुक क्यानाडा सातौँ स्थानमा रहेका छन् । यी मुलुकका पासपोर्ट वाहकले समान १ सय ८७ मुलुकमा भिसा बिना प्रवेश पाउँछन् । अघिल्लो वर्ष यो सूचीमा चेकिया सातौँ स्थानमा रहेको थियो । क्यानाडा र माल्टा समान आठौँ स्थानमा थिए । हङ्गेरी भने नवौँ स्थानमा थियो ।

अमेरिका

यो सूचीको आठौँ स्थानमा अमेरिका रहेको छ । हेन्स्ले एण्ड पार्टनर्सका अनुसार अमेरिकी पासपोर्ट वाहकले १ सय ८६ मुलुकमा भिसा विना प्रवेश पाउँछन् । अघिल्लो वर्ष अमेरिका यो सूचीमा सातौँ स्थानमा रहेको थियो ।

इस्टोनिया, लिथुएनिया र संयुक्त अरब इमिरेट्स

यो सूचीमा युरोपेली मुलुकहरु इस्टोनिया र लिथुएनिया तथा एशियाली मुलुक संयुक्त अरब इमिरेट्स नवौँ स्थानमा रहेका छन् । यी मुलुकका पासपोर्ट भएका व्यक्तिले समान १ सय ८५ मुलुकमा भिसा बिना प्रवेश पाउँछन् । अघिल्लो वर्ष यो सूचीमा इस्टोनिया १२ औँ, लिथुएनिया दशौँ र संयुक्त अरब इमिरेट्स १५ औँ स्थानमा रहेका थिए ।

आइसल्याण्ड, लात्भिया, स्लोभाकिया र स्लोभेनिया

यो सूचीमा युरोपेली मुलुकहरु आइसल्याण्ड, लात्भिया, स्लोभाकिया र स्लोभेनिया दशौँ स्थानमा रहेका छन् । यी मुलुकका पासपोर्ट भएका मानिसहरुले समान १ सय ८४ वटा मुलुकमा भिसा विना प्रवेश पाउँछन् । अघिल्लो वर्ष यो सूचीमा आइसल्याण्ड १३ औँ, लात्भिया र स्लोभेनिया समाान ११ औँ र स्लोभाकिया दशौँ स्थानमा रहेका थिए ।