शेयर बजार: नेप्से परिसूचक १७ अङ्कले घट्दा कारोबार रकम बढ्यो

काठमाडौँ– लगातार बढेको शेयर बजार कारोबार रकम बढेपनि नेप्से परिसूचक १७ अंकले घटेको छ । कारोबारका पछिल्ला चार दिन निरन्तर बढेको बजार आज नेप्से परिसूचक १७.१८ अंकले घटेको हो ।

आज (सोमवार) कारोवार रकम भने ६ महिनायताकै उच्च भएको छ । सरकार परिवर्तन हुने हल्लासँगै बढेको शेयर बजारमा आज आठ अर्ब ७३ करोड १४ लाख ३६ हजार रुपैयाँको शेयर कारोबार भएको हो ।

अघिल्लो दिनको तुलनामा सोमवारको कारोबार एक अर्ब ११ करोड रुपैयाँ बढेको हो । यद्यपि बजार खुल्नासाथ बढेको शेयर बजार केही समयमै ओरालो लागेर पुनः उकालो लागेको थियो । पछि भने शेयर बजार घटेको थियो ।

नेपाल स्टक एक्सचेन्जको वेबसाइट अनुसार आज (सोमवार) ५६ वटा कम्पनीको शेयर उकालो लागेको छ भने एक सय ८४ वटा कम्पनीको शेयर मूल्य अघिल्लो दिनको तुलनामा घटेको छ । त्यस्तै दुई कम्पनीको शेयर मूल्य यथावत् रहेको छ ।

त्यस्तै आज माण्डु हाइड्रोपावरको शेयर सबैभन्दा बढी भएको छ । त्यसपछि निफ्रा (नेपाल इन्फ्रास्टक्चर बैंक लिमिटेड) को शेयर मूल्य पनि १५ रुपैयाँले बढेको छ । जानकी फाइनान्स लिमिटेडको शेयर मूल्य भने आज सर्वाधिक घटेको छ । जानकीको प्रति शेयर ८२.५० ले घट्दा यसको मूल्य ७४२ पुगेको छ । यो कम्पनीको शेयर केही दिनदेखि बीचमा घटेर अन्तिम समयमा आएर बढ्ने गरेको थियो ।

त्यस्तै साम्लिङ पावर कम्पनी लिमिटेडको शेयर मूल्य पनि ३५ रुपैयाँ ४० पैसा घटेको छ ।

आज अपर तामाकोशी हाइड्रोपावर कम्पनीमा लगानीकर्ताले ३७ करोड आठ लाख ७२ हजार पाँच सय रुपैयाँ कारोबार भएको छ । त्यसपछि निफ्रामा २१ करोड ९८ लाख ९७ हजार ६ सय बराबरको शेयर कारोबार भएको छ भने नेगेटिभ सर्किट हानेको जानकी फाइनान्समा १९ करोड १५ लाख ४६ हजार रुपैयाँको कारोबार भएको छ ।

पछिल्लो केही समययता लगानीकर्ताहरुमा उत्साह देखिएको छ । लामो समय २ हजार कट्न मुस्किल परेको नेप्से परिसूचक थोरै घटेपनि २२ सय माथि रहेको छ ।