यस्तो अनौठो गाउँ, जहाँ ३ महिनासम्म लगातार अँध्यारो हुन्छ 

विश्वमा एउटा यस्तो गाउँ छ जहाँ वर्षका ३ महिना अँध्यारो भइरहन्छ । लगातार ३ महिना अँध्यारो भएका कारण त्यस क्षेत्रका स्थानीय बिरामी पर्दै आएका छन् ।

इटालीको उत्तरी इलाका विगनेला गाउँको चारैतर्फ पहाडले घेरिएको छ । जसका कारण जाडो मौसमको ३ महिना त्यहाँ सूर्यको प्रकाश पर्दैन । जसका कारण नोभेम्बरदेखि फेब्रुअरीसम्म त्यस क्षेत्रमा अँध्यारो हुने गर्दछ । यसरी लगातार ३ महिनासम्म अँध्यारो भएपछि र स्वास्थ्य लगायतका विभिन्न समस्या देखा परेपछि स्थानीयले आफ्नै कृत्रिम सूर्य बनाएका छन् ।

लगातार ३ महिनासम्म अँध्यारो हुने भएपछि स्थानीय नकारात्मक असर, अनिन्द्रा, मनोदशा बिग्रने, ऊर्जा स्तर कम हुने, अपराध बढ्ने लगायतका समस्या भोग्दै आएका थिए । यी सबै समस्याका कारण भने केवल सूर्यको प्रकाशको अनुपस्थिति थियो । यसैबाट बच्न त्यस क्षेत्रमा गाउँलेले आफ्नै सूर्य बनाए ।

सन् २००६ मा एक लाख युरोको लागतमा ८ मिटर लामो र ५ मिटर चौडा ठोस स्टिल सिटको निर्माण गरी यसै मार्फत सूर्यको प्रकाश गाउँसम्म आउने व्यवस्था मिलाइएको थियो । यही उपायका कारण जाडो मौसममा पनि त्यस गाउँमा ६ घण्टा सूर्यको प्रकाश आउने गर्दछ ।