विद्यालयको कक्षा कोठामा पानी पसेपछि पठनपाठन अवरुद्ध

रौतहट – रौतहटस्थित एउटा सामुदायिक विद्यालयको चौतर्फी पानी जमेपछि पठनपाठन अवरुद्ध भएको छ ।

जिल्लाको पूर्वीभेग दुर्गा भगवती गाउँपालिका स्थित एक सामुदायिक विद्यालयको कक्षाकोठा भित्र बर्सातको पानी जमेपछि पठनपाठन अवरुद्ध भएको हो । कक्षाकोठासँगै वर्षाको पानी  विद्यालयको प्राङ्गणमा समेत जमेपछि अध्ययनरत बालबालिका लाई कठिनाइ भएको छ।

दुर्गा भगवती १ स्थित जनता प्राथमिक विद्यालयको कक्षाकोठा र प्राङ्गणमा समेत पानी जमेर विद्यार्थीहरू समस्यामा परेका हुन् । विद्यालय प्राङ्गणमा डेढ दुई फिटसम्म पानी जमेपछि बिस्तारै कक्षा कोठामा समेत छिरेपछि पठनपाठन प्रभावित भएको प्रधानाध्यापक मुकेश चौधरीले बताए ।

विद्यालय तथा विद्यालय प्राङ्गण भन्दा चौतर्फी जमिन अग्लो रहेकाले सामान्य वर्षा  हुँदा पनि विद्यालयमा पानी जम्दै आएको प्रधानाध्यापक चौधरीको भनाई छ । कक्षा १ देखि ५ सम्म अध्यापन हुने उक्त विद्यालयमा करिब ३५० जना विद्यार्थी रहेका छन्।

बर्सातको मौसममा विद्यालयको चौतर्फी पानी जमेर विषालु सर्पको जोखिम भएको कारण केही दिनका लागि बिदा दिएर विद्यालय बन्द गरेको प्रधानाध्यापक चौधरीले जानकारी दिएका छन्। बर्सौँ देखिको विद्यालयको समस्या समाधान गर्न दुर्गा भगवती गाउँ पालिका सँगै  शिक्षा शाखालाई जानकारी गराउँदा पनि समस्या ज्युँ का त्युँ रहेको प्रधानाध्यापक चौधरीले गुनासो गरेका छन् ।

स्थानीय निकायले शिक्षा जस्तो संवेदनशील विषयमा गम्भीर नहुँदा सयौँ बालबालिकाको भविष्य अन्योलमा परेको अभिभावकहरूले गुनासो गरेका छन् ।