३८५ करोडमा बिक्यो ‘कल्की २८९८ एडी’को बक्सअफिस राइट

मुम्बई– प्रभास, दीपिका पादुकोण र अमिताभ बच्चनको बहुप्रतिक्षित फिल्म ‘कल्की २८९८ एडी’ यही जून १७ मा रिलिज हुँदैछ । नाग अश्विन निर्देशित फिल्मलाई लिएर फ्यानहरु निकै उत्साहित छन् । किनकी फिल्ममा पहिलोपटक प्रभास र दीपिका स्क्रिन शेयर गर्दैछन् ।

फिल्मको दोस्रो ट्रेलर रिलिज भइसकेको छ । ट्रेलरलाई पनि दर्शकहरुले निकै मनपराइरहेका छन् । यही बीचमा यो फिल्मको बक्सअफिस राइट ३ सय ८५ करोड रुपैयाँमा बिकेको छ । पिंकविलाका अनुसार फिल्मले रिलिजअघि नै बक्सअफिस राइट बेचेर ३ सय ८५ करोडको व्यापार गरिसकेको छ । कुनै पनि फिल्मको लागि यो हाइएस्ट प्रि–रिलिज इभेन्ट हो ।

फिल्मको आन्ध्र प्रदेश राइट्स ८५ करोड, सीडेड राइट्स २७ करोड र निजाम राइट्स ७० करोडमा बिक्री भएको छ । यसरी फिल्मको एपीटीएस व्यापार १ सय ८२ करोड छ ।

यो फिल्म यसअघि नै तामिलनाडुमा २२ करोड, कर्नाटकमा ३० करोड र नर्थ इण्डियामा ८० करोड रुपैयाँमा बिक्री भइसकेको छ । यस्तै फिल्मको ओभरसिज राइट्स ७० करोडमा बिक्री भएको छ ।

फिल्ममा मौनी रोय, कमल हासन र दुलकर सलमानको पनि अभिनय छ । फिल्ममा अमिताभ ‘अश्वत्थामा’, कमल हासन ‘काली’ र प्रभास ‘भैरव’ को भूमिकामा छन् । कमल फिल्मका भिलेन हुन् । ६ सय करोडमा बनेको यो फिल्ममा दीपिका ‘पद्मा’ चरित्रमा छिन् ।