गोलीबारी भएको रात सलमान खान के गर्दै थिए ?

काठमाडौँ – बलिउड अभिनेता सलमान खानको घरमा गोली हानाहानको घटनामा हरेक दिन नयाँ नयाँ अपडेटहरू आइरहेका छन् । यस मामिलामा मुम्बई क्राइम ब्रान्चले सलमान खान र उनका भाइ अरबाज खानको बयान रेकर्ड गरेको छ ।

यो घटनापछि लरेन्स बिश्नोईलाई साबरमती कारागारबाट हिरासतमा लिने तयारी भइरहेको छ । मुम्बई अपराध शाखाले कागजी कार्य पूरा गरिरहेको छ। गोली हानाहानपछि अपराध शाखाको टोली गत जुन ४ मा सलमान खानको बयान लिन उनको घर पुग्यो । ग्यालेक्सी अपार्टमेन्टमा गोली चलाउँदा सलमान घरमै थिए ।

यो घटना भएको झण्डै डेढ महिना बितिसकेको छ । जुन ४ मा दिउँसो १२ बजे क्राइम ब्रान्चका चार अधिकारी सलमानको बयान लिन ग्यालेक्सी अपार्टमेन्ट पुगेका थिए । प्राप्त जानकारी अनुसार क्राइम ब्रान्चको टोलीले सलमान खानको बयान लिन ३ देखि ४ घण्टा लगाएको थियो ।

जबकि अरबाज खानको बयान २ घण्टा भित्र रेकर्ड गरिएको थियो। साँझ ५ः३० बजे अपराध शाखाको टोली ९ पृष्ठको जवाफ लिएर सलमानको घरबाट निस्कियो । मुम्बई प्रहरीको अपराध शाखाको टोलीले सलमान खान र उनका भाइ अरबाज खानलाई करिब १५० प्रश्न सोधेको थियो ।

यसैबीच, गोलीबारी भएको रात सलमान खानको घरमा पार्टी भएको पनि खुलासा भएको छ । पार्टी सकिएपछि सलमान ढिलो सुते । तर बिहान करिब ५ बजे गोली चल्दा सलमान गोली चलेको आवाजले ब्युझिए । सलमानले यो घटना निकै गम्भीर रहेको स्वीकार गर्दै मुम्बई पुलिसले यस केसमा काम गर्ने तरिकाको प्रशंसा पनि गरे।

सलमान खान गोली हानाहानमा हालसम्म क्राइम ब्रान्चले २९ जनाको बयान लिइसकेको छ । यो घटना हुँदा सलमानका बुवा सलीम खान पनि घरमा थिए । सलीम खानको बयान नलिइएको मानिन्छ । बुढेसकालका कारण उनलाई कुनै प्रश्न सोधिएको छैन । आवश्यक परे उनको बयान लिने एक वरिष्ठ प्रहरी अधिकारीले बताए ।

मुख्य अभियुक्त लरेन्स बिश्नोईलाई साबरमती कारागारबाट छिट्टै हिरासतमा लैजाने प्रक्रिया सुरु हुने पनि प्रहरी अधिकारीले जानकारी दिए ।