छायांकनका क्रममा घाईते भए हलिउड अभिनेता ड्वेन जोन्सन

काठमाडौँ – फिल्म छायांकनका क्रममा हलिउड अभिनेता ड्वेन जोन्सन घाइते भएका छन् ।

फिल्म ‘द स्म्यासिङ मेसिन’को छायांकनको क्रममा उनको दाहिने कुहिनोमा गम्भीर चोट लागेको उनले इन्स्टाग्राममा भिडियो पोस्ट गर्दै जानकारी दिएका हुन् । 

भिडियोमा जोन्सनले भनेका छन्, ‘तपाईंहरुलाई थाहा नै छ, म ‘द स्म्यासिङ मेसिन’ नामक फिल्मको सुटिङ गरिरहेको छु । यसका केही दृश्य सुट गर्ने क्रममा मेरो कुहिनोको तल्लो भागमा धेरै चोट लागेको छ ।’

विश्व प्रसिद्ध रेस्लर तथा  ‘द रक’ उपनाम पाएका अभिनेता जोन्सनले अस्कर मनोनित एमिली ब्लन्ट र पेसेवर बक्सर अलेक्सान्डर उसिक अभिनित ‘द स्म्यासिङ मेसिन’मा मार्क केरको भूमिका निर्वाह गरेका छन् । 

उनले रेस्लरका रूपमा १० पटक विश्व च्याम्पियन, दुई पटक इन्टर कन्टिनेन्टल च्याम्पियन र ५ पटक ट्याग टिम च्याम्पियन बनिसकेका छन् । त्यस्तै अभिनेताका रूपमा उनको फास्ट एन्ड फ्युरियस सिरिज, जि आइ जो, जुमान्जी जस्ता फिल्महरु विश्वप्रसिद्ध छन् ।