टी-२० विश्वकपमा बङ्गलादेशको विजयी शुरुवात, श्रीलंकाको दोस्रो हार

काठमाडौँ – बङ्गलादेशले जारी टी-२० विश्वकपमा विजयी शुरुवात गरेको छ । शनिबार बिहान सम्पन्न खेलमा बङ्गलादेशले श्रीलंकामाथि २ विकेटको रोमाञ्चक जित हासिल गरेको हो ।

श्रीलंकाले दिएको १२५ रनको लक्ष्य पछाएको बङ्गलादेशले १९ ओभरमा ८ विकेट गुमाउँदै लक्ष्य पुरा गरेको थियो । यसअघि पहिला ब्याटिङ गरेको श्रीलंकाले २० ओभरमा ९ विकेट गुमाउँदै १२४ रन बनाएको थियो ।

यो बङ्गलादेशको यस विश्वकपमा पहिलो खेल हो । यो जितपछि बङ्गलादेशले समूह डी मा महत्त्वपूर्ण २ अंक हासिल गरेको छ ।

त्यस्तै श्रीलंकाले भने लगातार दोस्रो हार बेहोरेको छ । श्रीलंकाले पहिलो खेलमा दक्षिण अफ्रिकासँग हार बेहोरेको थियो ।

अब बङ्गलादेशले अर्को खेल सोमबार दक्षिण अफ्रिकासँग खेल्ने तालिका रहेको छ भने श्रीलंकाले बुधबार बिहान नेपालसँग खेल्ने तालिका रहेको छ ।