रोयल च्यालेन्जर्स बैंगलुरु प्लेअफमा, चेन्नई बाहिरियो

काठमाडौँ –  रोयल च्यालेन्जर्स बैंगलुरु इण्डियन प्रिमियर लिग (आईपीएल) को प्लेअफमा पुगेको छ । 

गएराती सम्पन्न खेलमा बैंगलुरुले चेन्नई सुपर किंग्सलाई २७ रन अन्तरले पराजित गर्दै प्लेअफमा पुगेको हो । 

बैंगलुरुले दिएको २१९ रनको लक्ष्य पछाएको चेन्नईले २० ओभरमा ७ विकेट गुमाउँदै १९१ रन बनाएपछि खेल बैंगलुरुले २७ रनले जितेको थियो । चेन्नईले प्लेअफमा स्थान बनाउन २०१ रन बनाउनुपर्नेमा चेन्नई सो रन बनाउन असफल भएको थियो । 

त्यसपछि बैंगलुरु समान १४ अङ्क भए पनि रन रेटका आधारमा प्लेअफमा छानिएको थियो । 

योसँगै यस सिजनको आईपीएलमा प्लेअफमा पुग्ने चार टिमको टुङ्गो लागेको छ ।  जसमा कोलकोता, राजस्थान, सनराइजर्स र बैंगलुरु रहेका छन् । कोलकोता अङ्क तालिकामा शीर्ष स्थानमा कायम रहेको छ भने बैंगलुरु चौथो स्थानमा रहने पक्का भएको छ ।  अब आज हुने अन्तिम खेलले दोस्रो र तेस्रो स्थानको टुङ्गो लगाउने छ । 

आईपीएलमा प्लेअफअघिका अन्तिम दुई खेल आज हुँदै छन् ।  आज सनराइजर्स हैदरावाद र पञ्जाव तथा कोलकोता र राजस्थान खेल्दै छन् ।