टिजरमा यस्तो देखियो दयाहाङ र मिरुनाको ‘घर ज्वाइँ’ (भिडियो)

काठमाडौँ– दयाहाङ राई र मिरुना मगरको शीर्ष भूमिका रहेको फिल्म ‘घर ज्वाइँ’को टिजर सार्वजनिक गरिएको छ । मगर संस्कार र संस्कृतिलाई नजिकबाट नियाल्ने प्रयास गरिएको फिल्मको टिजर आज (आइतवार) युट्युबमार्फत सार्वजनिक गरिएको हो ।

टिजरमा दयाहाङ राई र मिरुना मगरको शीर्ष भूमिका देखिन्छ । त्यस्तै सो टिजरमा मिरुनालाई पाउन दयाहाङले गरेको कोशिश र घर ज्वाइँ बस्नुपर्ने कारण प्रेममा आउने द्वन्द्वलाई देखाउन खोजिएको छ ।

यो फिल्मलाई अनिल बुढा मगरले निर्देशन गरेका हुने भने जनक घर्ती मगरले निर्माण गरेका हुन् । सुसन प्रजापतिले खिचेको यो फिल्ममा कथा भने निर्देशक मगरकै रहेको छ । फिल्मलाई पूर्वी रुकुमका विभिन्न क्षेत्रमा छायाङ्कन गरिएको छ ।

असार २८ गते प्रदर्शनमा आउने ‘घर ज्वाइँ’मा दयाहाङ र मिरुनाका अलवा बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्कबहादुर पुन (खबपु), राज थापा, कविता आले, शिला आले, अनु थापा, बिना थापा मगर, सोनाम लामा, बिबेश बुढा मगर, सुनिल मगरले अभिनय गरेका छन् ।

सिनेमाका गीतमा हर्क साउद र मनोज थापाको शब्द तथा संगीत छ । कृष्ण भन्डारीले सम्पादन गर्ने सिनेमाको डिजिटल पार्टनर बुढा सुब्बा डिजिटल हो । एमएसएमले अष्ट्रेलियाले सिनेमाको विदेश प्रदर्शन अधिकार लिएको छ । नेपालमा सिनेमालाई आरआर फिल्मसले वितरण गर्दैछ ।

भिडियो: