काठमाडौँ– मल्टिस्टारर फिल्म ‘पुजार सार्की’ को ट्रेलर सार्वजनिक गरिएको छ । राजधानीमा आयोजित एक कार्यक्रममा फिल्मको ट्रेलर सार्वजनिक गरिएको हो ।
यसअघि सार्वजनिक गरिएका गीत र टिजरले राम्रो प्रतिक्रिया पाएको छ । आज (मङ्गलवार) सार्वजनिक गरिएको ट्रेलरमा जातीय विभेदको कथालाई मुख्य विषयवस्तु बनाइएको छ ।
चार दशकअघिको नेपाली समाजलाई फिल्मको पर्दामा देखाउन खोजिएको यो फिल्ममा अभिनेता प्रदीप खड्काले एक दलित युवकको भूमिका निर्वाह गरेका छन् भने आर्यन सिग्देलले ब्राह्मण समुदायको युवकको भूमिका निर्वाह गरेका छन् । ट्रेलरमा पल शाह, अञ्जना बराइली र परीक्षा लिम्बुलाई पनि स्थान दिइएको छ ।
फिल्मलाई दिनेश राउतले निर्देशन गरेका हुन् । उनले यसअघि पनि सामाजिक कथा उठाउँदै आएका छन् । दिनेशले निर्देशन गरेको पछिल्लो फिल्म ‘प्रकाश’ ले पनि राम्रो प्रतिक्रिया पाएको थियो ।
नेपाली समाजका घटनालाई टपक्क टिपेर उतार्ने निर्देशक राउतले यो फिल्ममा जातीय विभेदको मुद्दालाई उठान गरेका छन् ।
आउँदो जेठ १० गतेबाट प्रदर्शनमा आउने यो फिल्ममा प्रेम सुब्बा, लोकेन्द्र लेखक, मोहन निरौला, सुवास गजुरेल लगायतका कलाकारको समेत अभिनय रहेको छ ।
फिल्मलाई सुवास भुसालले निर्माण गरेका हुन् भने राजेश श्रेष्ठले खिचेका हुन् ।
यस्तो छ ट्रेलरः
यो खबर पढेर तपाईलाई कस्तो महसुस भयो ?
प्रतिक्रिया