काठमाडौँ– अभिनेता अनमोल केसीले आफूलाई कुनै ट्याग नचाहिने बताएका छन् । राजधानीमा आयोजित फिल्म ‘फर्की फर्की’ को ट्रेलर रिलिज कार्यक्रममा उनले यस्तो बताएका हुन् ।
अनमोललाई फिल्म मेकरले मेगास्टार भन्दै प्रचार गर्ने गरेका छन् । अनमोलले भने आफूले अझै पनि अभिनय सिक्दै गरेको समेत बताए ।
‘मैले भर्खरै त दश वटा फिल्ममा काम गरेको छु, सिकिरहेको छु,’ उनले भने । साथै उनले आफूलाई आफूलाई दिइने ट्यागमा कुनै विश्वास नलाग्ने समेत स्पष्ट पारे ।
‘मैले त शुरुदेखि भन्दै आएको हो, न त आफूलाई मेगास्टार मान्छु, न त सुपरस्टार मान्छु, मैले यस्ता ट्यागमा विश्वास गर्दिनँ तर दर्शकले माया गरेर दिनुहुन्छ भने त्यसको पनि सम्मान गर्छु,’ उनले भने ।
साथै उनले फिल्म ‘फर्की फर्की’ मा आफूले पृथक भूमिकामा अभिनय गरेको समेत बताए । फिल्ममा अनमोलले अभिनेत्री जसिता गुरुङसँग अनस्क्रिन रोमान्स गरेका छन् ।
जेठ १० गतेदेखि प्रदर्शनमा आउने यो फिल्ममा रोहित अधिकारीको लगानी छ भने सुयोग गुरुङले निर्देशन गरेका हुन् । फिल्म टाइम ट्राभलको कथामा आधारित रहेको जनाइएको छ ।
यो खबर पढेर तपाईलाई कस्तो महसुस भयो ?
प्रतिक्रिया