यस्तो छ दयाहाङ र मिरुनाको ‘मनसरा’ ट्रेलर (भिडियो)

काठमाडौँ– उपेन्द्र सुब्बा निर्देशित फिल्म ‘मनसरा’को ट्रेलर सार्वजनिक गरिएको छ । वैशाख २१ गतेदेखि प्रदर्शनमा आउने भनिएको सो फिल्मको ट्रेलर आज (बुधवार) एक कार्यक्रमका बीच सार्वजनिक गरिएको हो ।

ग्रामीण भेगको कथालाई साहित्यिक शैलीमा प्रस्तुत गरिएको यो ट्रेलरमा दयाहाङ राई, मिरुना मगर, प्रविण खतिवडा र मेनुका प्रधानलाई देखाइएको छ । पुरुष र महिलाबीच हुने शारीरिक आकर्षणलाई निर्देशक सुब्बाले फिल्मको कथानक बनाएको ट्रेलरबाट बुझ्न सकिन्छ ।

यो फिल्ममा लोकमणि सापकोटा, विद्या कार्की लगायतका कलाकारको समेत अभिनय रहेको निर्माण टिमले जनाएको छ ।

शैलेन्द्र डि कार्कीको डीओपी रहेको फिल्म ‘मनसरा’ को टिजरमा कथानकबारे धेरै खुलाइएको छैन । कबड्डी फिल्मसको ब्यानरमा बनेको यो फिल्मले रिलिजअघि नै चर्चा कमाएको छ ।

गत वर्ष उपेन्द्र सुब्बाले निर्देशन गरेको फिल्म ‘जारी’ ले वर्षकै सबैभन्दा बढी कमाइ गरेको थियो । सो फिल्ममा पनि दयाहाङ राई र मिरुना मगरको शीर्ष भूमिका देख्न सकिन्छ ।