‘फर्की फर्की’मा अनमोल र जसिताको यस्तो लूक

काठमाडौँ– युवापुस्तामाझ लोकप्रिय अभिनेता अनमोल केसी र अभिनेत्री जसिता गुरुङ स्टारर फिल्म ‘फर्की फर्की’ को नयाँ पोस्टर सार्वजनिक गरिएको छ ।

निर्माता रोहित अधिकारीले फिल्मको ट्रेलर रिलिज मिति घोषणा गर्दै नयाँ पोस्टर सार्वजनिक गरेका हुन् । उनका अनुसार फिल्मको ट्रेलर यही बिहीवार सार्वजनिक गरिनेछ ।

पछिल्लो सार्वजनिक गरिएको पोस्टरमा अनमोल र जसिताको आर्कषक लूक देखाइएको छ । यसअघिका पोस्टरमा पनि यी दुईको जोडीलाई नै फिचर्ड गरिएको थियो ।

आगामी जेठ १० गतेदेखि प्रदर्शनमा आउने तयारीमा रहेको यो फिल्म प्रेमकथामा आधारित रहेको जनाइएको छ ।

लभ स्टोरी जनरामा बनेको यो फिल्मलाई ओम प्रकाश अग्रवालसँग मिलेर रोहित अधिकारीले निर्माण गरेका हुन् । फिल्ममा मनोज ओली र रामु न्यौपाने सह–निर्माताको रूपमा छन् ।

सुयोग गुरुङको निर्देशन रहेको फिल्ममा अनमोलको अलावा जसिता गुरुङ, रवि काफ्ले, समृद्धि अर्याल, कृष्ण मल्ल, निर्मल शर्मा लगायतका कलाकारको अभिनय देख्न सकिन्छ ।