आजको मौसम : तीन ओटा प्रदेशमा वर्षाको सम्भावना

काठमाडौँ – अहिले लुम्बिनी  प्रदेश लगायत देशको पहाडी भू–भागमा आंशिक बदली रही बाँकी भू–भागमा मौसम मुख्यतया सफा रहेको जल तथा मौसम विज्ञान विभाग,मौसम पूर्वानुमान महाशाखाले जनाएको छ । 

महाशाखाका अनुसार देशमा अहिले  पश्चिमी वायु र स्थानीय  वायुको आंशिक प्रभाव रहेको छ भने आज दिउसो  कर्णाली र सुदूरपश्चिम प्रदेश लगायत  देशको पहाडी भू–भागमा आंशिक देखि साधरणतया बदली रहने छ ।

बाँकी भू–भागमा आंशिक बदली देखि मौसम मुख्यतया सफा रहँदा कोशी, गण्डकी र कर्णाली प्रदेशको पहाडी भू–भागको थोरै र बाँकी  पहाडी भू–भागको एक–दुई स्थानहरूमा  हल्का वर्षाको सम्भावना रहेको छ।

त्यस्तै उच्च पहाडी तथा हिमाली भू–भागको थोरै स्थानहरूमा हल्का हिमपातको समेत सम्भावना रहेको महाशाखाको दैनिक मौसम बुलेटिनमा उल्लेख छ । 

आज राती सुदूरपश्चिम र कर्णाली प्रदेशमा आंशिक देखि साधरणतया बदली रही बाँकी भू–भागमा आंशिक बदली देखी मौसम मुख्यतया सफा रहने छ। 

कोशी, गण्डकी र  कर्णाली प्रदेशको पहाडी भू–भागका  एक–दुई स्थानमा मेघ गर्जन र चट्याङ्गसहित हल्का वर्षाको सम्भावना रहेको छ।

गण्डकी र  कर्णाली प्रदेशको उच्च पहाडी तथा हिमाली भू–भागका एक–दुई स्थानमा हल्का हिमपात हुनसक्ने महाशाखाको पूर्वानुमान छ ।