यस्तो छ प्रदीप स्टारर फिल्म ‘एक्लो’ को पोस्टर, रिलिज कहिले?

काठमाडौँ– प्रदीप खड्काको शीर्ष भूमिका रहने फिल्म ‘एक्लो’ को पोस्टर सार्वजनिक गरिएको छ । निर्माण टिमले सामाजिक सञ्जालमार्फत पृथक शैलीको पोस्टर सार्वजनिक गरेको हो ।

सिक्वेलका रुपमा समेत निर्माण गर्ने भनिएको यो फिल्ममा प्रदीपलाई फरक अवतारमा देखिएको छ । पोस्टरका आधारमा फिल्ममा अन्तरिक्षमा जाने कथा हुने अनुमान गर्न सकिन्छ । यद्यपि निर्माण टिमले यसबारेमा धेरै खुलासा गरेको छैन ।

स्पेस शूटमा नेपालको झण्डासमेत पोस्टरमा देख्न सकिन्छ ।

साइन्स फिक्सन जोम्बी फिल्मको जनरा अन्तर्गत राखिएको यो फिल्मको कथा एलिएनसँग सम्बन्धित हो कि भनेर अड्कल काटिएको छ । नेपालमा यस्ता खालका सिनेमा नबनेकाले पनि यो सिनेमाले पोस्टरबाटै चर्चा कमाएको छ ।

प्रदीप खड्का, विजय लामा, वेनिषा हमाल, दीया पुन, कविता नेपाली, अभोनराज उप्रेती, सुनिल थापा लगायतका कलाकारको अभिनय रहने भनिएको यो सिनेमालाई प्रदीप शाहीले निर्देशन गर्नेछन् ।

साथै यो सिनेमाले सन् २०२५ मा प्रदर्शनमा ल्याउने निर्माण टिमको तयारी छ । पोस्टरमा फिल्मको नाम ‘एक्लो–१’ राखिएको छ ।

फिल्मको छायांकन आगामी साउनबाट थालिने निर्माण टिमले जनाएको छ ।