मानव कंकालले बनेको अनौठो चर्च !

प्राग– इसाई धर्मावलम्बीहरुले प्रार्थाना गर्ने स्थान चर्च अत्यन्त पवित्र मानिन्छ । चर्चलाई पवित्र राख्न इसाईहरुले सकेसम्म प्रयत्न गर्छन् ।

तर, युरोपेली मुलुक चेक गणतन्त्रमा एउटा अचम्मको चर्च छ, जुन ४० हजार देखि ७० हजार मानव कंकालले बनाइएको छ । चेक गणतन्त्रको बोहेमिया क्षेत्रमा रहेको सेडलेक शहरमा रहेको चर्च मानव कंकालले बनाइएको छ ।

शुरुमा यो चिहानको रुपमा रहेको थियो । ब्लाक डेथ र हुसाइट युद्धका क्रममा यो चिहानघारीमा हजारौं मानिसहरुलाई गाडिएको थियो ।

त्यसपछि सन् १५११ मा यो चिहानलाई सुन्दर बनाउनका लागि यहाँ गाडिएका मानिसहरुको कंकालको प्रयोग गरी नयाँ चर्च बनाउनका लागि एकजना अर्धदृष्टिविहीन इसाई भिक्षुलाई जिम्म दिइएको थियो । त्यसपछि उनले त्यहाँ कंकालबाट सुन्दर चर्च निर्माण गरे ।

उक्त चर्च अझै पनि चेक गणतन्त्रको ऐतिहासिक धरोहरको रुपमा रहेको छ । यहाँ हरेक वर्ष लाखौं पर्यटकहरु भ्रमण गर्न आउने गरेका छन् ।