काठमाडौँ– यस वर्षको ९६ औँ ओस्कार अवार्डमा फिल्म ‘ओपनहाइमर’ ले सर्वाधिक सात विधामा अवार्ड हात पार्यो ।
‘ओपनहाइमर’ ले बेस्ट पिक्चर अवार्डका साथै यही फिल्मबाट निर्देशक क्रिस्टोफर नोलेनले बेस्ट डाइरेक्टरको अवार्ड समेत जिते । यस्तै किलियन मर्फेलाई बेस्ट एक्टरको उपाधि दिइयो भने रोबर्ट डाउनर जुनियरले बेस्ट सपोर्टिङ एक्टरको उपाधि चुमे ।
सात विधामा अवार्ड जितेपछि यो फिल्मले व्यापक चर्चा कमायो ।
यो फिल्म विश्वभर नै चर्चामा रह्यो । ट्रेलरपछि नै फिल्मले एकाएक हाइप लिएको थियो । रिलिजपछि पनि फिल्मलाई लिएर निकै चर्चा भयो ।
दोस्रो विश्वयुद्धका बेलाको विषय समेटिएको यो फिल्ममा भौतिकशास्त्री रोबर्ट ओपनहाइमरको वास्तविक कहानीलाई फिल्ममा उतारिएको छ ।
उनले विश्वमै सबैभन्दा पहिले अणु बम निर्माणका लागि महत्त्वपूर्ण भूमिका निर्वाह गरेका थिए ।
त्यसपछि विश्वमा अणु बमको युग शुरु भएको थियो । अहिले विश्वका धेरै शक्तिशाली देशसँग अणु बम छन् । अणु बमले एकैछिनमा ठूल्ठूला शहर नष्ट गर्ने क्षमता राख्छ ।
‘फादर अफ द एटोमिक बम’ भनिने तीनै ओपनहाइमरको जीवनीमा फिल्म ‘ओपनहाइमर’ निर्माण गरिएको हो ।
फिल्ममा किलियन मर्फीले ओपनहाइमरको भूमिका निभाएका छन् ।
बक्स अफिस मोजोका अनुसार फिल्मले हालसम्म ९ सय ५८ मिलियन डलर कमाइ गरेको छ । अर्थात्, यो फिल्मले नेपाली रुपैयाँ १ खर्ब २७ अर्ब १० करोड ९५ लाखभन्दा बढी कमाइ गरेको छ ।
हालसम्म ओस्कार अवार्ड पाउने फिल्ममध्ये यो फिल्म कमाइका हिसाबले दोस्रो नम्बरमा पर्छ । यसअघि ओस्कार विजेता फिल्म ‘लर्ड अफ द रिङः द रिटर्न अफ द किङ’ ले १ हजार १ सय ४० मिलियन डलर कमाइ गरेको थियो । यो फिल्मले सन् २००३ मा ओस्कार जितेको थियो ।
यो खबर पढेर तपाईलाई कस्तो महसुस भयो ?
प्रतिक्रिया