कलाकारले जुनसुकै भूमिकामा पनि अभिनय गर्नुपर्छ भन्ने लागेर आमाको भूमिका निर्वाह गरेँ: वर्षा राउत

काठमाडौँ– पछिल्लो समय चर्चामा रहेकी अभिनेत्री वर्षा राउत फिल्म ‘महाजात्रा’ मार्फत दर्शकमाझ आउँदै छिन् । यो फिल्ममा उनले सम्पदाको भूमिका निर्वाह गरेकी छिन् ।

उनले अभिनय गरेका फिल्म ‘नाईं नभन्नु ल ४’, ‘छक्का पञ्जा’ र ‘जात्रा’ ले राम्रो व्यापार गरे । एकपछि अर्को फिल्म बक्सअफिसमा हिट भएपछि म्युजिक भिडियोमा समेत उनलाई अफर आइरहेको छ ।

चैत्र ९ गतेदेखि प्रदर्शनमा आउने फिल्म ‘महाजात्रा’ मा उनको शीर्ष भूमिका छ । उनले फिल्ममा फडिन्द्र (विपिन कार्की) की श्रीमतीको भूमिकालाई पर्दामा उतारेकी छिन् । उनले शुरुमा आफूलाई यो फिल्ममा काम गर्न त्यति सहज नभए पनि पछि रमाइलो लागेको बताइन् ।

‘शुरुमा यो टिमसँग कसरी काम गर्ने होला भन्ने थियो तर पछि वर्कशप गर्न थालेपछि रमाइलो लाग्न थाल्यो,’ वर्षाले अगाडि थपिन्, ‘पछि त हामी फिल्मी परिवारजस्तै भएका थियौँ ।’

वर्षाले तेस्रो सिक्वेलमा आइपुग्दा उनी छोराकी आमाको भूमिका निभाएकी छिन् । उनले कलाकारले जुनसुकै भूमिका निभाउनुपर्ने भएकाले यो फिल्ममा आमाको भूमिका निभाउदा पनि सहज लागेको बताइन् ।

‘म हिरोइन मै सिमित नभई कलाकार बन्ने सोच बोकेर आएको हुँदा पनि मलाई ती भूमिका गर्न हुन्न् की भन्ने नै लागेन,’ उनले भनिन् ।

साथै उनले आफूलाई व्यावसायिक फिल्ममा मात्र नभएर पृथक फिल्ममा देखिन समेत मन लागेको बताइन् । उनले भनिन्, ‘व्यावसायिक फिल्म त धेरै खेलेँ तर मलाई आर्ट फिल्ममा पनि काम गर्न मन लागेको छ, जुन फिल्ममा समाजले देखिरहने तर महसूस गर्न नसकेको कथालाई पर्दामार्फत दर्शकमाझ पुर्‍याउन सकियोस् ।’