काठमाडौँ– तामाङ सेलो गायिका जितु लोप्चनलाई ‘योगिता मोक्तान प्रतिभा पुरस्कार–२०८०’ प्रदान गरिएको छ ।
सोमवार गायिका मोक्तानको १३ औं स्मृति दिवसको अवसरमा नेपाल तामाङ कलाकार संघले बौद्ध चुच्चेपाटीस्थित नेपाल तामाङ घेदुङमा गरिएको कार्यक्रममा लोप्चनलाई उक्त पुरस्कारबाट सम्मान गरिएको हो ।
संस्कृति, पर्यटन तथा नागरिक उड्डयन मन्त्री हित बहादुर तामाङले लोप्चनलाई सम्मानपत्र र नगद २० हजार रुपैयाँ हस्तान्तरण गरे । पुरस्कारले संगीत क्षेत्रमा लाग्न अझै प्रेरणा मिल्ने लोप्चनले बताइन् ।
एक दशकभन्दा लामो समयदेखि सांगीतिक यात्रामा रहेकी लोप्चनका तीन सय भन्दा बढी गीतहरू सार्वजनिक भइसकेका छन् ।
पुरस्कृत लोप्चनलाई बधाइ तथा शुभकामना दिँदै कलाकार संघका अध्यक्ष तथा गायक विशाल काल्तानले कार्यक्रममा सहभागी सम्पूर्णप्रति आभार व्यक्त गरे ।
कार्यक्रममा लोक सम्राट चन्द्र कुमार मोक्तान, गायिका इन्दिरा गोले, घेदुङका सह-अध्यक्ष कुमार घिसिङ लगायतकाको उपस्थिति थियो ।
यो खबर पढेर तपाईलाई कस्तो महसुस भयो ?
प्रतिक्रिया