काठमाडौँ– भारतीय धनाढ्य व्यवसायी मुकेश अम्बानीका कान्छा छोरा अनन्त अम्बानीको प्रि–वेडिङको चर्चा चौतर्फी छ । तर, यो विवाह समारोहमा सबैभन्दा अनन्तको भन्दा बढी चर्चा उनका बाबुआमा मुकेश र नीता अम्बानीको भयो ।
विवाहमा मुकेश र नीताको डान्स र रोमान्स पनि हेर्नलायक थियो ।
मुकेश र नीताले विवाह गरेको झण्डै ४० वर्ष भइसकेको छ । वैवाहिक जीवनमा यति धेरै वर्ष बिताए पनि दुवैको प्रेम सम्बन्ध अझै पनि भर्खरका युवायुवतीको झैँ लाग्छ ।
व्यवसायी मुकेश अम्बानी गम्भीर स्वभावका छन् । तर रियल लाइफमा भने उनि निकै रोमान्टिक छन् । मुकेश र नीताको प्रेम कहानी कुनै बलिउड फिल्मभन्दा कम छैन ।
मुकेशका पिता धीरुभाइले शुरुमा देख्नेबित्तिकै नीतालाई मन पराएका थिए । धीरुभाइले नीतालाई पहिलोपटक कलेजमा आयोजना गरिएको नृत्य कार्यक्रममा देखेका थिए । उक्त कार्यक्रममा देख्नेबित्तिकै उनले नीतालाई मन पराएका थिए ।
पहिले हेराइमै उनलाई केटी आफ्नो परिवारमा बुहारी बन्न सक्ने लक्षणको लाग्यो । नृत्य कार्यक्रमको एक दुई दिनपछि धीरुभाइ आफैँले नीतालाई फोन गरेर भेट्न बोलाए । तर, नीतालाई भने धीरुभाइले नभई मजाकमा अर्कै मान्छेले फोन गरेजस्तो लाग्यो ।
धीरुभाइले दुई तीन पटक फोन गरेपछि नीताले फोनै उठाउन छाडिन् । पछि धीरुभाइले नीताका बुवालाई फोन गरे । त्यसपछि बल्ल नीताले त्यो फोन अरु कसैले नभई धीरुभाइले नै गर्दै आएको चाल पाइन् ।
त्यसपछि बल्ल उनी धीरुभाइको अफिस पुगिन् । र, आफ्नो अफिस पुगेकी हुनेवाला बुहारीसँग उनले सोधे, ‘मेरो जेठो छोरासँग भेट है ?’
त्यसपछि नीता र मुकेशबीच भेट हुने साइत जुर्यो ।
‘नीता पहिलो केटी हुन्, जसलाई मैले जीवनसङ्गिनी बनाउन सोचिसकेको थिएँ, उनी मेरी नै हुन्,’ मुकेशले एक भारतीय समाचार पोर्टलसँगको कुराकानीमा भनेका छन् ।
यसरी भेटघाट र कुराकानी बाक्लिँदै गएपछि नीताले मुकेशलाई आफूसँगै बसमा यात्रा गर्न आग्रह गरिन् । नीताको मायामा मुकेश अम्बानी आफ्नो लग्जरी कार छोडेर बसमा चढे ।
उनीहरुको विवाहको प्रस्तावको प्रसङ्ग पनि रोचक नै छ । मुकेशले नीतालाई गरेको प्रपोज कुनै फिल्मभन्दा कम थिएन । एउटा रोमान्टिक साँझ मुम्बईमा नीता र मुकेश कार चढेर कतै जाँदै थिए । एक्कासी पेदार रोड नजिकै उनीहरुको कार ट्राफिकमा फस्यो ।
ट्राफिक लाइटमा गाडी रोकिएपछि मुकेश अम्बानीले नीतालाई हठात् सोधे, ‘मसँग बिहे गर्ने हो ?’
नीता लाजले रातोपिरो भइन् । उनले मुकेशलाई गाडी चलाउन भनिन् । सिग्नल खुलेपछि पनि उनले गाडी चलाएनन् । उनीहरुको कार त्यहीँ टक्क अडियो ।
ट्राफिक लाइटमा गाडीको लस्कर नै रोकिरहेको थियो । पछाडिबाट धेरै गाडीले हर्न बजाइरहेका थिए । तर मुकेशले भने, ‘तिमीले जवाफ नदिएसम्म म गाडी चलाउदिनँ ।’
मुम्बईको सडक न हो, मुकेशले यति भनिसक्दा सडकमा गाडीको लामै लाइन थियो । सडकमा ट्राफिक जाम नै लाग्यो । त्यसपछि नीताले एउटा शर्त तेर्साइन्, ‘मलाई बिहेपछि पनि काम गर्न दिनुपर्छ ।’
मुकेशले वाचा गरे, उनले नीतालाई बिहेपछि पनि काम गर्न दिने भए ।
यसपछि बल्ल नीता–मुकेशको विवाह निश्चित भयो । विवाहपूर्वको शर्त पूरा गर्दै मुकेशले नितालाई विद्यालय सञ्चालनकै जिम्मेवारी दिए ।
मुकेशको सानैदेखिको चाहना शिक्षक बन्ने रहेको बताइन्छ । उनले एउटा अन्तर्वार्तामा भनेका छन्, मेरा बुबाले मलाई रिलायन्समा ल्याउनुअघि म अमेरिकी विश्वविद्यालयमा पढ्ने निश्चितजस्तै थियो । म कि त विश्व बैंकमा जागिर खान चाहन्थेँ या त म शिक्षक बन्न चाहन्थेँ ।’
नीता विवाहको केही वर्ष समयसम्म धीरुभाइ अम्बानी इन्टरनेशनल स्कुल चलाउँथिन् । उनीहरुको विवाह सन् १९८५ मा धुमधामसँग भएको थियो । उनीहरुले ३ सन्तान जन्माएका छन् । तीनैमध्येका कान्छा छोरा अनन्त अम्बानीको भर्खरै प्रि–वेडिङ सम्पन्न भएको छ ।
यो खबर पढेर तपाईलाई कस्तो महसुस भयो ?
प्रतिक्रिया