काठमाडौँ – पूर्व बलिउड अभिनेत्री तथा राजनीतिकर्मी जया प्रदालाई एमपी–एमएलए अदालतले पक्राउ गर्न आदेश दिएको छ ।
सातौँ पटकसम्म पनि अदालतमा उपस्थित नभएपछि प्रहरीलाई छुट्टै टोली बनाएर जयालाई पक्राउ गर्न आदेश दिएको हो । अभिनयबाट राजनीतिमा आएकी जयाविरुद्ध आचारसंहिता उल्लङ्घनको मुद्दामा रामपुरमा रहेको एमपी– एमएलए अदालतले ६ वटा गैर जमानती वारेन्ट जारी गरेको छ ।
सन् २०१९ मा जया प्रदा भारतीय जनता पार्टी (भाजपा) को प्रतिनिधित्व गर्दै रामपुरबाट लोकसभाको उम्मेदवार थिइन् । त्यसताका जयाले र्यालीका क्रममा केही आचारसंहिता उल्लङ्घन गरेको आरोप छ ।
उनी विरुद्ध दुई कानुनी मुद्दा दर्ता भएका छन् । अदालतले जयालाई पटक–पटक अदालतमा उपस्थित हुन भनिरहेको छ ।
यद्यपि, उनले अदालतको आदेशलाई गम्भीर रूपमा लिइनन् । जस कारण अदालतले कुनै विकल्प विना नै जयामाथि पक्राउ वारेन्ट जारी गर्नुपर्यो । हालसम्म जया वा उनको टिमले कानुनी अपडेटका बारेमा कुनै पनि आधिकारिक विज्ञप्ति जारी गरेका छैनन् ।
जया सन् ७० देखि ८० को दशककी लोकप्रिय अभिनेत्री हुन् । १३ वर्षको उमेरमा तेलुगू फिल्मबाट अभिनयमा डेब्यू गरेकी उनको वास्तविक नाम ललिता रानी राव हो । उनले सन् १९९४ मा अभिनय छोड्दै राजनीतिमा जोडिने निर्णय लिएकी थिइन ।
यो खबर पढेर तपाईलाई कस्तो महसुस भयो ?
प्रतिक्रिया