फिल्म ‘रङ्गेली’को दोस्रो गीत ‘दुल्हा दुल्हन’ सार्वजनिक

काठमाडौँ – नेपाली चलचित्र ‘रङ्गेली’को दोस्रो गीत रिलिज भएको छ ।  ‘दुल्हा दुल्हन’ वोलको यो गीत विवाह गीतको रूपमा तयार पारिएको छ ।

गीतमा निशान भट्टराईको स्वर रहेको छ भने सविन एकतारेका शब्दमा सुशान्त गौतमको सङ्गीत रहेको छ ।

यो गीतको भिडियोको ‘सेटअप’ पनि पृथक् शैलीमा गरिएको छ । जहाँ अभिनेता दयाहाङ राई र अभिनेत्री मिरुना मगरको विवाह समारोहमा भएको साङ्गीतिक कार्यक्रमको पृष्ठभूमिमा तयार गीतको भिडियोमा अभिनेता विजय बराललाई प्रमुख स्थान दिइएको छ । उनलाई  ‘कमेडी’ शैलीमा भिडियोमा प्रस्तुत गरिएको छ । 

‘रङ्गेली’लाई अर्जुन सुवेदीले निर्देशन गरेका हुन् । सुवेदी नै यसका लेखक हुन् । यसमा दयाहाङ राई, अर्पण थापा, मिरुना मगर, प्रवीण खतिवडा, रमेश बुढाथोकी लगायतको प्रमुख भूमिका रहेको छ ।

यस चलचित्रका गीतहरूमा हर्क साउद, अर्जुन सुवेदी र सबिन एकतारेको शब्द रचना तथा सुशान्त गौतम र हर्कुलस बस्नेतको सङ्गीत रहेको छ । फिल्म फागुन २५ गते रिलिज हुने बताइएको छ ।