धूमका तीन सफल फ्रेन्चाइज फिल्मपछि यशराज प्रोडक्सनले चाँडै नै चौथो फिल्म ‘धूम ४’ ल्याउने भएको छ ।
फिल्ममा शाहरुख खानको चर्चा छ भने दक्षिण सुपरस्टार रामचरण पनि महत्त्वपूर्ण भूमिकामा देखिने खबरहरू आएका छन् । त्यस्तै धूम फ्रेन्चाइजीमा रामचरणले अभिषेक बच्चनको स्थान लिने दाबी गरिएको छ ।
यद्यपि यसै वर्ष पठान, जवान र डंकी जस्ता ब्लकबष्टर फिल्म दिएका शाहरुख खानले अहिलेसम्म यो फिल्म साइन भने नगरेको रिपोर्टहरूमा बताइएको छ ।
बलिउड अभिनेता तथा निर्माता उदय चोपडा पछिल्लो ३ धूम फ्रेन्चाइजी फिल्मका हिस्सा रहेका छन् । हालै उदयले एक अन्तर्वार्तामा ‘धूम ४’ मा शाहरुख खान चोरको भूमिकामा उत्कृष्ट देखिने बताएका थिए ।
उनको यही भनाइलाई ‘धूम ४’ को कास्टिङतर्फ सङ्केतका रूपमा लिदै धेरैले शाहरुख भिलेनको रूपमा देखिन लागेको चर्चा चलाएका हुन् ।
धूम बलिउड सिनेमाको उत्कृष्ट फ्रेन्चाइजी मध्ये एक हो । धूम फ्रेन्चाइजीको पहिलो फिल्म सन् २००४ मा रिलिज भएको थियो भने जोन अब्राहम, अभिषेक बच्चन, उदय चोपडाको महत्त्वपूर्ण भूमिका निर्वाह गरेका थिए ।
फिल्म ‘धुम २’ सन् २००६ मा रिलिज भएको थियो, जसमा ऋतिक रोशन, अभिषेक बच्चन, ऐश्वर्या राई, उदय चोपडाको महत्त्वपूर्ण भूमिका थियो ।
त्यस्तै २०१३ मा रिलिज भएको ‘धुम ३’ मा आमिर खानले दोहोरो भूमिका निर्वाह गरेका थिए। फिल्ममा उनीसँगै कट्रिना कैफ पनि मुख्य भूमिकामा थिइन् ।
यो खबर पढेर तपाईलाई कस्तो महसुस भयो ?
प्रतिक्रिया