काठमाडौँ – आहा रारा पोखरा गोल्डकपको २३औं संस्करण अन्तर्गतका खेलमा आज मच्छिन्द्र फुटबल क्लब र जावलाखेल युथ क्लबबीच हुँदैछ । खेल साढे २ बजे पोखरा रङ्गशालास्थित फुटबल मैदानमा हुनेछ ।
आजसम्म यो गोल्डकपको उपाधीविहिन दुवै टिम पहिलोचोटि आमनेसामने हुँदै छन् । मच्छिन्द्रले ५ र जावलाखेल युथ क्लबले तीन पटक भाग लिए पनि कुनै पनि संस्करणमा दुवै टिम भिडेका थिएनन् ।
आहा रारामा मच्छिन्द्रको यो छैंटौं सहभागिता हो । अघिल्लो संस्करणमा प्रिक्वार्टर फाइनलमै चर्च ब्वाइजसँग मच्छिन्द्र ३–१ ले पराजित हुँदै बाहिरिएको थियो ।
यता जावलाखेलको आहा रारामा यो चौंथो सहभागिता हो । २०६८ मा भएको दशौं संस्करणमा सहभागी भएको जावलाखेलले डेब्यु प्रतियोगितामै फाइनलसम्म पुगे पनि मनाङमर्स्याङ्दी क्लबसँग २–० अन्तरले पराजित हुँदै इतिहास कायम गर्न चुक्यो ।
११औं आहारारा गोल्डकपमा पनि जावलाखेल सेमिफाइनलसम्म पुगेको थियो । उक्त संस्करणको सेमिफाइनलमा थ्रीस्टारसँग २–१ ले पराजित भएको थियो ।
१२औं संस्करण पनि सहभागी भएको जावलाखेल प्रिक्वार्टरमै संकटा क्लबसँग १–० ले पराजित हुँदै बाहिरिएपछि भने आहा रारा गोल्डकपमा सहभागी हुन छोडेको थियो ।
यसकाे अर्थ आहा रारामा जावलाखेल एक दशकपछि फर्किएको हो । आजको खेल जित्ने टिम क्वार्टर फाइनलमा प्रवेश गर्नेछ र माघ १५ गते मनाङ मर्स्याङ्दीसँग अन्तिम ४ का लागि प्रतिस्पर्धा गर्नेछ ।
यसअघि प्रिक्वार्टरका २ खेल भइसकेका छन् । जसमध्ये पहिलो खेलमा आयोजक सहारा क्लबलाई २–१ ले हराउँदै थ्रीस्टार क्लब र राइजिङ स्टार क्लबलाई १–० ले हराउँदै विभागीय टिम नेपाली आर्मी क्लबले अन्तिम ८ मा आफ्नो स्थान पक्का गरिसकेका छन् ।
यो खबर पढेर तपाईलाई कस्तो महसुस भयो ?
प्रतिक्रिया