यी १० रोचक तथ्य जो तपाईंलाई थाहा नहुन सक्छन्

छिमेकी मुलुक भारतको साँस्कृतिक, राजनीतिक, आर्थिक र धार्मिक रुपमा नेपालसँग नजिकको सम्बन्ध छ । सोही कारण धेरै नेपालीलाई भारतका धेरै पक्षबारे जानकारी छ । तर, त्यस्ता केही तथ्य र जानकारीहरु छन्, जुन सबै नेपालीलाई थाहा नहुन सक्छ । भारतका १० रोचक तथ्य यहाँ प्रस्तुत गरिएको छ ।

सबैभन्दा धेरै अङ्गेजी भाषा बोल्ने दोश्रो मुलुक

भारतमा हिन्दी र अंग्रेजी गरी दुई भाषालाई आधिकारिक रुपमा राष्ट्रिय भाषाको मान्यता छ । सोही कारण भारतमा हिन्दीसँगै अंग्रेजी भाषा बोल्ने मानिसहरुको सङ्ख्या पनि ठूलो छ ।

एक अध्ययन अनुसार भारतमा करिब १० प्रतिशत मानिसहरुले अंग्रेजी भाषा बोल्ने गरेका छन् । यो भनेको करिब १२ करोड भन्दा धेरै हो । यसमध्ये ठूलो सङ्ख्या दक्षिण भारतमा छ । यसअनुसार भारत अमेरिकापछि सबैभन्दा धेरै अंग्रेजी भाषा बोल्ने मुलुकमा पर्न जान्छ ।

कबड्डी विश्वकप

भारतमा परम्परागत खेल कबड्डी निकै नै लोकप्रिय छ । भारतले पछिल्ला केही वर्षयता प्रो कबड्डी लिगको नामबाट यो खेलको व्यावसायीकरण पनि गरेको छ । तर, सबैभन्दा रोचक तथ्य त के छ भने भारतले हरेक कबड्डी विश्वकप जितेको छ ।

सन् २००४ बाट आयोजना हुन थालेको कबड्डी विश्वकपको हरेक संस्करणको उपाधि भारतले जितेको छ । अर्को रोचक कुरा हरेक कबड्डी विश्वकपको उपविजेता पनि एउटै मुलुक इरान रहँदै आएको छ ।

स्पाम्फू

आजक विश्वका हरेक कुनामा स्नान गर्दा स्याम्फू प्रयोग गरिन्छ । तर धेरैलाई थाहा नहुन सक्छ, स्याम्फूको अवधारणा भारतबाट आएको हो ।

आजकल प्रयोग गरिने तरल पदार्थ भारतबाट नआए पनि धेरै अगाडि नुहाउने बेला विभिन्न जडिबुटीको तरल पदार्थलाई कपालमा दल्ने अवधारणा भने भारतबाट नै आएको हो । त्यस्तै, स्याम्फू शब्द पनि संस्कृत भाषामा च्याम्पू शब्दबाट आएको हो, जसको अर्थ मालिस गर्नु भन्ने हुन्छ ।

शाकाहारी

बहुसङ्ख्यक भारतीयहरु हिन्दू धर्मावलम्बी छन् । हिन्दू धर्ममा शाकाहारी भोजनलाई प्राथमिकता दिइन्छ । अनुमानअनुसार भारतका २० देखि ३० प्रतिशत मानिसहरु शाकाहारी छन् । सोही कारण भारत विश्वमा सबैभन्दा धेरै शाकाहारी बसोबास गर्ने मुलुक बन्न पुगेको हो ।

साइकलमा रकेट

सुन्दा अचम्म लाग्नसक्छ, भारतले पहिलो पटक प्रक्षेपण गरेको रकेट साइकलमा लगिएको थियो ।

भारतले प्रक्षेपण गरेको पहिलो रकेट यति हलुङ्गो र सानो थियो कि दक्षिण भारतको केरला राज्यस्थित थुम्ब प्रक्षेपण केन्द्रमा सन् १९६३ मा यसको प्रक्षेपण गर्दा यसलाई साइकलमा हालेर लगिएको थियो ।

दूध

बहुसङ्ख्यक हिन्दू धर्मावलम्बीको बसोबास रहेको भारतमा गाईलाई आमा कै दर्जा दिने गरिएको छ ।

त्यहाँ गाईलाई निकै श्रद्धाका साथ लिइन्छ । सोही कारण भारतमा दूधको उत्पादन पनि धेरै हुने गरेको छ । भारत दूध उत्पादनका लागि अग्रणी मुलुक हो ।

सन् २०१४ मा मात्रै भारतले युरोपेली युनियनलाई उछिनेर दूध उत्पादनका लागि पहिलो मुलुक बन्न सफल भएको हो ।

हिरा

हिराको उत्खनन सर्वप्रथम भारतबाट भएको हो । भारतको कृष्णा नदीको डेल्टास्थित गुनटुर कृष्णा जिल्लामा हिराको उत्खनन हुने गरेको थियो । १८ औं शताब्दीमा ब्राजिलमा हिरा पत्ता लाग्नुअघिसम्म भारत सबैभन्दा धेरै हिरा उत्खनन गर्ने मुलुकको रुपमा रहेको थियो ।

चिनी

भारतीयहरुले पहिलो पटक चिनीलाई प्रशोधन गरेका थिए । सायद यहीकारण भारतीयहरु गुलियो खानेकुरा एकदमै रुचाउने गरेका छन् । भारतबाट नै पश्चिमा मुलुकमा चिनीको विस्तार भएको थियो ।

अन्तरिक्षबाट समेत देखिने कुम्भ मेला

हिन्दु धर्मावलम्बीको बाहुल्यता रहेको भारतको पवित्र नदीको किनारमा रहेका शहरहरुमा कुम्भ मेलाको आयोजना हुने गरेको छ । कुम्भ मेलामा करोडौं मानिसहरुको भेला हुने गरेका छन् ।

कुम्भ मेलालाई सबैभन्दा ठूलो धार्मिक मेलाका रुपमा समेत लिने गरिन्छ । सन् २०११ मा आयोजित कुम्भ मेला यतिसम्म विशाल थियो कि यसमा भेला भएका करोडौं मानिसहरुको भीडलाई अन्तरिक्षबाट समेत देखिएको थियो ।

हुलाक कार्यालय

भारत सबैभन्दा ठूलो हुलाक सञ्जाल भएको मुलुक हो । तथ्यांक अनुसार भारतमा १ लाख ५५ हजार भन्दा धेरै हुलाक कार्यालय छन् । औसतमा एक हुलाक कार्यालयले ७ हजार भन्दा धेरैलाई सेवा दिने गरेको छ ।

भारतको जम्मूकश्मीरको राजधानी शहर श्रीनगरको नेहरु पार्कमा रहेको एउटा तालमा यस्तो हुलाक कार्यालय छ, जुन पानीमाथी तैरिन्छ । पानीमाथि तैरिने हुलाक कार्यालयको स्थापना भने सन् २०११ मात्र गरिएको थियो ।