कफी तपाईको स्वास्थ्यको लागि कति फाइदाजनक छ ?

काठमाडौं । आजको समयमा कफिको नाम नसुन्ने र नपिउने साहेत कम मानिस होलान्। चिया जस्तै कफी पनि एक वैधानिक पेय पदार्थ हो। कफी विश्वमा पेट्रोलियम पदार्थपछि धेरै आर्थिक कारोबार हुने बस्तुमा दोश्रो नम्बरमा पर्छ।

प्रत्येक दिनको तथ्यांक हेर्ने हो भने विश्वमा २ अर्ब २५ करोडभन्दा बढी कप कफी खपत भैरहेको अवस्था छ। आज विश्वमा सामान्य दिनचर्याको सुरुआत होस् या सामान्य भेटघाटदेखि परिवर्तनका योजनाहरु पनि कफी गफमै हुने गर्दछन्।

कफी संस्कृतिको विकास आज मानिस बासोबास गर्ने संसारका जुनसुकै कुनामा पनि पुगेको देखिन्छ। युवापुस्ता माझ अझै लोकप्रिय कफीलाई विश्वका कतिपय देशमा व्यक्तिहरुको मान प्रतिष्ठा र संस्कारसँग जोडेर हेर्ने चलन रहेको छ।

संसारमा धेरै यस्ता मानिसहरु छन् जो बिहान एक कप कफि नपिइकन आफ्नो दिनको सुरुवात गर्दैनन् । यी मानिसहरुका अनुसार कफीले उनीहरुको दैनिक उत्पादकत्वमा धेरै राम्रो प्रभाव पार्छ । यस्ता कैयौं अनुसन्धानहरु भएका छन् जसले कफी स्वास्थ्यको लागि राम्रो भएको तथ्य पत्ता लगाएको छ ।

कफि साथीहरु भेट भएर घन्टौं गफगाफ गर्ने माध्यम हो । आजकाल ठूला शहरमा मात्रै होइन साना शहरमा पनि कफि पिउने चलन सुरु भएको छ । कफीको यस्ता सामाजिक मेलमिलापका फाइदाको बारेमा हामी सबै जानकार छौं । तर कफी स्वास्थ्यको लागि कति महत्वपूर्ण छ ? यसको सेवनले हाम्रो स्वास्थ्यमा कस्तो फाइदा गर्छ यस बारेमा धेरैलाई थाहा नहुन सक्छ ।

दिनमा तीन देखि चार कप कफी पिउनु स्वास्थ्यको लागि धेरै नै राम्रो हुने मानिन्छ एक अध्ययनले देखाएको छ । अध्ययन अनुसार दुध र चिनी नराखी कफी पिउनु स्वास्थ्यको लागि सबैभन्दा राम्रो हुन्छ । त्यस्तै कफीको साथमा तपाईले कुनै पनि हेभी स्न्याक्स खाएमा भने त्यसले तपाईले कफीबाट पाउने फाइदालाई कम गर्छ ।

कफीका हरेक कप कफीले तपाईलाई डायबिटिज हुने खतरालाई ७ प्रतिशत सम्म कम गरिदिन्छ । नियमित रुपमा कफी पिउनाले टाइप २ डायबिटिजको खतरा धेरै कम हुन्छ ।

कफीमा पाइने क्याफिन पार्किन्सन्सको रोगका बिरामीलाई उपयोगी हुन सक्छ ।

कफी पिउनाले कलेजोको क्यान्सरको खतरा केही हदसम्म कम हुन्छ ।

कफी पिउने मानिसहरु कफी नपिउने मानिसहरुको तुलनामा धेरै लामो आयो बाँच्न सक्ने कुरा अध्ययनले जनाएको छ ।

कफीले तपाईलाई काम गर्नको लागि ताजगी मात्रै दिँदैन यसले तपाईलाई स्वास्थ्यसम्बन्धी अरु पनि फाइदा गर्छ ।

ठिक्क मात्रामा कफी पिउनाले हृदयघात, मस्तिष्कघात, मधुमेह र संक्रमणको जोखिम न्यून गराउँछ।

रातिमा पढ्ने मानिसले निद्रा लागेका बेला कफी खायो भने निद्रा हराउँछ।

कसैलाई बिहान खाली पेटमा कफी खाँदा फाइदा गर्न सक्छ भने कसैलाई ग्यास्टिकको समस्या हुन सक्छ। राति सुत्नुअघि कफी खानु त्यति राम्रो मानिँदैन, निद्रा नपर्न सक्छ।

तर, कफी स्वास्थ्यको लागि हरेक स्थितिमा राम्रो हुन्छ भन्ने जरुरी छैन । नियमित रुपमा कफिको सेवन नगर्ने मानिसले कफी पिएमा उसलाई हर्टअट्याक हुने खतरा पनि हुन सक्ने एक अध्ययनले देखाएको छ ।