आजको मौसम : केही स्थानमा वर्षा,तराईमा हुस्सु र कुहिरो

काठमाडौँ – अहिले देशको पहाडी भू–भागमा आंशिक बदली र तराईका अधिकांश स्थानहरूमा हुस्सु–कुहिरो लागेको जल तथा मौसम विज्ञान विभाग मौसम पूर्वानुमान महाशाखाले जनाएको छ ।

महाशाखाका अनुसार नेपालमा अहिले  पश्चिमी वायुका  साथै  बङ्गलादेशको दक्षिण भू–भाग आसपास रहेको न्यून चापीय प्रणालीको समेत आंशिक प्रभाव रहेको छ ।

यही कारण देशका पहाडी भू–भागका एक–दुई स्थानमा हल्का वर्षाको सम्भावना रहेको छ।

त्यस्तै  उच्च पहाडी तथा हिमाली भू–भागका थोरै स्थानमा  हल्का हिमपातको सम्भावना रहँदा  पहाडी भू–भागमा आंशिक देखि साधरणतया बदली रहने महाशाखाको पूर्वानुमान छ । बाँकी भू–भागमा आंशिक बदली देखि मौसम मुख्यतया सफा रहनेछ। 

त्यस्तै आज राती देशको पहाडी भू–भागमा आंशिक देखि साधरणतया बदली रही बाँकी भू–भागमा आंशिक बदली देखि मुख्यतया सफा रहनेछ।

कोशी, गण्डकी र कर्णाली  प्रदेशका पहाडी भू–भागका एक–दुई स्थानमा हल्का वर्षाको सम्भावना रहेको महाशाखाले जनाएको छ । देशका उच्च पहाडी तथा हिमाली भूभागका एक-दुई स्थानमा  हल्का हिमपातको सम्भावना रहेको छ।