एनिमलका बारेमा कोंकणा सेन शर्माले के भनिन ?

काठमाडौं । अभिनेत्री कोंकणा सेन शर्मा अहिले आफ्नो वेब सिरिज ‘किलर सूप’ को कारण चर्चामा छिन् । यस सिरिजमा उनको साथमा मनोज बाजपेयी पनि छन्, जसलाई दर्शकले निकै रुचाइरहेका छन् । हालै, कोंकणाले एक अन्तर्वार्तामा रणबीर कपुर स्टारर फिल्म ‘एनिमल’ को बारेमा आफ्नो धारणा राखेकी थिइन्। उनले यसलाई आफ्नो शैलीभन्दा फरक फिल्म भनेकी थिइन् र अभिनेत्रीले यो फिल्म अहिलेसम्म नहेरेको पनि बताइन् ।

एनिमल २०२३ को ब्लकबस्टर फिल्म मध्ये एक हो। रणवीर कपुर स्टारर यो फिल्म रिलिज भएको करिब डेढ महिना बितिसक्दा पनि सिनेमाघरमा चलिरहेको छ । यो फिल्मले हालसम्म ९ सय करोडभन्दा बढी कलेक्सन गरिसकेको छ ।

योसँगै दर्शकले निकै माया पनि दिएका छन् । तर, फिल्ममा महिला चरित्र र हिंसाका विषयमा आलोचना भएको थियो, जसमा मानिसहरुको आ–आफ्नै तर्क छ । अब यो तर्क गर्नेको लाइनमा अभिनेत्री कोंकणा सेन शर्माको नाम पनि जोडिएको छ ।

‘एनिमल’ बारे कोंकणाले ठोस कारण नभएसम्म पर्दामा हिंसा देखाउन आफूलाई कुनै आपत्ति नभएको बताइन् । यही कुरा अंतरंग दृश्यहरूमा पनि लागू हुन्छ। त्यस्ता दृश्यहरू हेर्न उनलाई कुनै आपत्ति छैन, तर हिंसा र घनिष्ठ दृश्यहरू कथालाई अगाडि बढाउनको लागि उद्देश्य हुनुपर्छ। कोंकणाले थप भनिन्, ुफिल्ममा यी दृश्यहरू हुनुको लागि ठोस कारण हुनुपर्छ, किनभने तिनीहरू पात्रहरूसँग सम्बन्धित छन्। फिल्ममा यो दृश्य किन छ वा यसबारे निर्देशकको मनसाय के छ ? महत्व राख्छ।

कोंकणाले सन् २००९ मा रणबीर कपुरसँग रोमान्टिक कमेडी फिल्म ‘वेक अप सिड’ मा काम गरेकी थिइन् तर उनले अहिलेसम्म ‘एनिमल’ नदेखेको बताइन् । तर, उनी निर्देशक सन्दीप रेड्डी वांगाको कामको तारिफ गर्छिन् । अन्तर्वार्तामा अभिनेत्रीले भनिन्, ‘जहाँसम्म मैले बुझेँ, ‘एनिमल’ नहेर्दा मैले गल्ती गरेको हुन सक्छ, तर यो मेरो प्रकारको फिल्म हो जस्तो लागेन । समीक्षा र अन्य कुराले पनि मलाई यो फिल्मतर्फ आकर्षित गर्न सकेन ।